Mga milyonaryo sa Oslob

Ang Commission on Audit (COA) maoy labing una nga nakapalili sa mga Sugbuanon unsa g’yud diay kadako ang kita sa lungsod sa Oslob sa habagatang Sugbo gikan sa gatosan ka lokal ug langyaw’ng mga turista nga magdugok pagtan-aw ug paglangoy uban sa higanteng mga tuki sa ilang kadagatan: P1.2 milyones

matag adlaw.

Nabisto ang dakong kantidad tungod sa kabalaka sa COA nga mahimong kawaton, o mawani, o magamit sa laing katuyoan tungod sa kapakyas sa munisipyo pagdeposito ini ngadto sa bangko sa samang adlaw o sa pagkasunod adlaw. Naghilum-hilom lang diay apan labihang datoa na sa Oslob.

* * *

Gipasabot hinuon dayon ni Oslob Mayor Jose Tumulak Jr. nga 30% ra sa kinatibuk-ang kita ang madawat sa munisipyo; ang labing dakong bahin nga 60% iya sa Tan-awan Oslob Sea Wardens and Fishermen’s Association (TOSWFA); ug ang nahibiling 10% iya sa Barangay Tan-awan nga maoy nahimutangan sa mga tuki.

Palaban dayon ko og calculator nga nitug-an pilay bahin sa mga milyonaryo sa Oslob:

• Ang munisipyo makabahin og P360,000 matag adlaw, P10.8 milyones matag buwan ug P129.6 milyones matag tuig;

• Ang TOSWFA makabahin og P720,000 matag adlaw, P21.6 milyones matag buwan ug P259.2 milyones matag tuig; samtang

• Ang barangay makabahin og P120,000 matag adlaw, P3.6 milyones matag buwan ug P43.2 milyones matag tuig.

Bisan o tungod ba kaha sa kadako sa ilang kita, nagdumili ang Oslob pagbayad og buhis sa Bureau of Internal Revenue (BIR). Nga nideklarar nga ang kita sa tuki kapahamtangan og income tax, value-added tax (VAT), expanded withholding tax, deficiency withholding tax on VAT and other percentage taxes, withholding tax on compensation, ug registration fees sukad sa 2012.

Maong gipugngan sa BIR ang P440.7 milyones nga deposito sa Oslob sa mga bangko aron mapugos pagbayad sa kapin sa P50 milyones nga utang nga buhis.

* * *

Samtang nakiglalis sa buhis, angay’ng mopahibawo giunsa paggasto ang:

• P129.6 milyones matag tuig nga bahin sa munisipyo nga makatukod na og 86 ka classrooms nga makasukol og bagyong Yolanda; ug

• P43.2 milyones matag tuig nga bahin sa Tanawan nga makatukod og 28 ka classrooms nga sama kalig-on.