Pag-abiba bisan sayop
Bisan unsay isulti ni Presidente Rodrigo Duterte, bisan unsa pa ka kasayop o kabakak, wa nay mangahas sa pagsukwahi niya. Iyang mga tigpamaba ug ang mga tagduma sa hingtungdan nga mga buhatan sa gobyerno magkara-kara na sa pag-agpas unsay tinuod niyang gipasabot o pagpagawas og mga sukaranan sa iresponsable niyang mga pangangkon. Di mabasol ang mga opisyal ug mga kawani sa gobyerno nga naglumba pagyangu-yango bisan unsay iyang luwatan nga mga pamahayag. Kay nahibawo sila unsay nahitabo sa ilang mga kauban, nga karon mga kanhi opisyal na, nga nangisog sa pagkurihir sa presidente.
Duha sa nabiktima pulos mga tagduma sa Dangerous Drugs Board (DDB) nga maoy gitahasan pag-umol og mga lagda sa ilegal nga drugas:
•Gitaktak si kanhi DDB chairman Benjamin Reyes kay nipahibawo nga 1.8 milyones ka Pilipinhon ang adik sa drugas, sukwahi sa pangangkon sa presidente nga upat ka milyon nang mga adik; ug
•Gitaktak sab si kanhi DDB chairman Dionisio Santiago, ang nipuli ni Reyes, human niingon nga dakong sayop ang pagtukod sa wa kapusli nga higanteng rehabilitation center sa Nueva Ecija.
Tungod sa kahadlok nga mosunod ni Reyes ug Santiago, ang ubang mga opisyal sa gobyerno nagsilbing tigsawo sa mga pung nga ilabay sa presidente. Apan ang nasobrahang paningkamot pagtabon sa mga sayop nakamugna hinuon og mas dakong kauwawan.
Human dasoni ang pasangil sa presidente sa kataas sa kriminalidad sa Naga City nga maoy pinuy-anan ni Bise Presidente Leni Robredo, napugos ang kapolisan pagpangayo og pasaylo human ipagawas ni Robredo ang listahan sa PNP nga mas ubos ang kriminalidad sa Naga kon itandi sa ubang mga dakbayan.
Aron ba kaha pagtabon sa kauwaw, naahat ang kapolisan pagpagawas sa opisyal nga listahan sa gidaghanon sa kriminalidad sa tanang dakbayan. Nga nagpakita og mas dakong eskandalo: Ang Davao City, nga gipatuo ni Presidente Duterte nga usa sa labing luwas sa tibuok kalibotan, maoy numero uno sa mga kaso sa lugos samtang ang Naga ika-29 ra.
Ang kataas sa kriminalidad sa Naga ang gipasikaran sa presidente pagpasangil nga di takos si Robredo nga mopuli niya. Karong napamatud-an nga mas daghan diay og krimen ang Davao, kinsa may labaw nga di takos nilang duha?