Bukbok ug smuggling
Nagtinulisokay na ang mga tinudlo ni Presidente Rodrigo Duterte sa responsibilidad sa krisis sa bugas humay. Inay moangkon og responsibilidad sa padayong pagsulbong sa presyo ug pagnihit sa suplay sa bugas humay, nag-unay na hinuon ang mga gitahasan sa presidente sa pagduma sa industriya sa bugas. • Si Tomas Escarez, officer-in-charge sa National Food Authority (NFA) nibasol sa NFA Council (NFAC) sa kalangay sa importasyon sa bugas humay; apan
• Si Ruth Castelo, Undersecretary sa Department of Trade and Industry (DTI) ug sakop sa NFAC, nibasol sa ka-iresponsable sa NFA.
Matod ni Escarez nananghid sila sa NFAC sa pag-import og bugas humay niadto pang Oktubre sa niaging tuig. Apan Mayo na karong tuiga, o pito ka buwan human sa pag-awhag sa NFA, nga nitugot ang NFAC sa importasyon.
Apan duha ang sumbalik ni Castelo: Una, nalangay ang NFA pagsumiter og imbentaryo sa suplay sa bugas humay aron himuong sukaranan sa importasyon; ug ikaduha, ang iresponsable nga pahibawo sa NFA nga hapit na mabasiyo ang ilang mga bodega sa tibuok nasud maoy gipahimuslan sa commercial rice traders sa pagpaburot sa ilang presyo.
Nabantang ning binasolay sa iyang mga tinudlo ang dakong papel ni Presidente Duterte sa krisis sa bugas humay: Ang iyang gitudlo nga mga tagduma sa industriya nipalabi sa ilang panagsungi kay sa pagtuman sa ilang trabaho.
Human nangiyugpos lang atubangan sa away sa NFA ug NFAC, gipili niya ang sayop nga manok. Gitaktak niya si Cabinet Secretary Jun Evasco isip tsirman sa NFAC ug gipalabi si NFA Administrator Jason Aquino nga napamatud-an sa makadaghan nang higayon nga di kamao sa iyang trabaho. Ang rason? Si Aquino ang usa sa labing unang niawhag niya pagdagan ug nangampanya paghimo niyang presidente.
* * *
Gawas nga wa matinuod ang pasalig ni Aquino nga mobarato ang commercial rice kon maapudapod nang NFA rice, gipakapinan og bukbok ang kapin sa 100,000 ka sakong NFA rice sa mga bodega sa Luzon.
Samtang nangandam si Aquino pagkaon sa bukbok atubangan sa publiko aron pagmatuod nga di ni makadaot sa panglawas, nisugyot si Agriculture Secretary Manny Piñol, laing sinaligan sa presidente, sa paglegalisar sa rice smuggling isip sulbad sa krisis sa bugas humay.