Way makakurihir sa presidente
Nahasol ko sa pangutana sa prinsipal sa eskuylahang publiko nga nakatambong sa pakigpung ni Presidente Rodrigo Duterte atol sa Charter Day sa Dakbayan sa Mandaue: Unsaon man nato pagtulid ang sayop nga mga pamahayag sa labing taas nga opisyal sa nasud?
Nakaihap siya og duha ka sayop sa mga gipanulti sa presidente atubangan nila: Ang iyang pag-insistir nga hotbed sa shabu ang Naga City sa Camarines Sur (si PNP Chief Oscar Albayalde mismo nihimakak sa pangangkon); ug nga adik ang hapit tanang polis ug PDEA sa Sugbo (way gipakitang ebidensiya).
Wa mag-inusara ang prinsipal sa iyang kalibog. Tingali gisaw-an ang iyang sentimento sa iyang kaubang mga magtutudlo. Mahimo gani nga nakadawat sila sa samang mga pangutana gikan sa mga tinun-an ug mga ginikanan.
Nabalaka ko nga mao sab ni ang pangutana sa ubang nagpakabana nga mga sektor sa katilingban nga nakabati sab sa hapit matag adlaw niya nga mga pakigpung sa nagkalainlaing bahin sa nasud pinaagi sa mga sibyaanan sa radyo ug telebisyon. Unsaon man tinuod nimo pagkurihir ang presidente sa gibalikbalik nga sayop niyang mga pangangkon?
Ang laktod nga tubag: Dili. Di kang kaisa sa imong kamot samtang nagdiskurso ang presidente aron kurhian siya. Di sab kang kapugos niya pagtul-id sa iyang mga sayop. Human sa kapin sa duha ka tuig nga pagtungkawo sa Malakanyang, wa mopakita og kaandam ang presidente pag-angkon nga nasayop siya.
Di sab kang kadangop sa mga hukmanan. Kay sa kinatibuk-an unom ka tuig niyang termino, di siya mapasakaan og bisan unsang kaso.
Apan di ka inutil. Samtang di kang kapugos sa presidente pagtarung sa iyang sinultihan, di sab siyang kapugos nimo sa pagtuo niya. Ang kataas sa iyang katungdanan ug kadako sa iyang gahom di makahigot nimo pagyangu-yango bisan unsay iyang isulti.
Kon imong kuwestiyunon ang tanan niyang sayop nga mga pangangkon, maangkon nimo ang dakong gahom: Di na ka niya malingla, di na ka niya mahudlat, di na ka niya mapugos paglingiw ug pagpangiyugpos ug pagdawat na lang sa di makiangayon nga mga panghitabo ug, labaw sa tanan, makapaningil ka na uban sa kinabag-an nga susama og panghunahuna sa pagpatigbabaw sa kaligdong, kamatuoran, ug kaangayan.