Way kinutobang pakauwaw
Samtang nag-ung-ong na ang laing hugna sa ani sa kahumayan, nitumaw na sang mga pagduda sa katakos o kaandam sa National Food Authority (NFA) sa pagpamalit sa tipasi sa mga mag-uuma aron nga di sila kapahimuslan sa hakog nga mga negosyante:
- Gidudahan ang katakos sa NFA tungod sa ilang pangangkon nga P20 matag kilo ra ang support price samtang P23 ang kinabaratohang bungat sa mga negosyante; apan
- Gidudahan sab ang ilang kaandam tungod sa pagkabisto nga mas baratong tipasi sa ubang rehiyon apan gipasimang sa NFA ang gahin pagbayad sa ilang utang.
* * *
Nag-atubang karon og kasong pagpangawkaw silang NFA Administrator Jason Aquino ug ubang mga opisyal human sila nasakpi sa Commission on Audit nga nipasimang sa P5.1 bilyones nga gahin unta sa pagpamalit og humay ug mais ngadto sa pagbayad sa iyang utang sa Land Bank of the Philippines ug Development Bank of the Philippines.
Gawas nga nakalapas sa General Appropriations Act, ang pagdumili sa NFA pagpamalit og mga tipasi nakapabasiyo sa ilang mga bodega ug nisangpot sa pagpahimus sa mga negosyante pinaagi sa pagpaburot sa presyo sa commercial rice.
* * *
Human nabisto ang ilang mga bakak (pananglitan, nahibaw-an sa mga senador nga may tipasi sa mga umahan sa Luzon nga tag-P13 rang kilo apan wa palita sa NFA ug wa matinuod ang ilang pasalig nga mobarato ang commercial rice inig abot sa imported nga NFA rice), magduda nang mga konsumidor sa bisan unang pangangkon nilang Aquino ug kaubanan.
Nakat-on ba g’yud sa nangagi nilang kasaypanan? O mangandam na tang daan sa mas grabe pang mga krisis nga umaabot?
* * *
Nipasalig ang NFA nga modunggo sa Sugbo karong semanaha ang 120,000 ka sakong bugas humay gikan sa Thailand ug dugang 120,000 ka sako sunod semana. Sa di pa ta magsaulog, angay’ng hinumdoman nga ang unang rice shipment niadtong Hunyo ning tuiga naabtan og kapin sa buwan una nabaligya sa kamerkadohan.
Wa kinahanglanang paglangay-langay ang gipasundayag sa NFA sa Sugbo. Mas dako nilang pakauwaw nisangpot sa bukbok sa 100,000 ka sakong NFA rice sa Luzon ug sa tag-P80 matag kilo nang bugas humay sa Zamboanga ug ubang bahin sa Mindanao.