Pagpuypoy sa mga pagduda
Sa wa pa makabuylo ang pagkatap sa mga pagduda nga nilingiw ug nangiyugpos ang kapolisan aron gawasnon ang armadong mga lalaki nga morakrak ug mopatay ni Mayor Mariano Blanco III sud sa iyang buhatan sa munisipyo sa Ronda niadtong Miyerkules sa kadlawon, gitangtang ni Police Regional Office-7 Chief Debold Sinas ang tanang
polis sa Ronda nga nag-duty atol sa insidente.
Tingali nadutlan na si Sinas sa nangaging mga pagduda nga silay nagpasiugda sa laktod nga mga patay. Apan kahibudngan gihapon nganong gipalabay ang usa ka adlaw una girelibohan.
***
Abunda tinuod ang mga sukaranan nga dudahan ang mga polis sa Ronda:
•Nihukom ang hepe ug upat niya ka sakop sa pag-serve og arrest warrant sa bukirang barangay sa tungang gabii, usa ka oras sa wa pa patya ang mayor;
•Nadungan nga ngpatrolya ang ubang mga polis sa ubang mga dapit sa lungsod layo sa munisipyo; ug
•Ang duha ka polis nga nahibilin sa presinto niinsistir nga wa sila kabati sa pagpangrakrak sa munisipyo nga napu ra ka metro gikan sa ilang nahimutangan tungod sa kusog nga bunok sa uwan.
***
Kadudahan sang kadagkoan sa Cebu Provincial Police Office:
•Unsa mang orasa sila nga napahibawo sa pagpangrakrak ug unsa may mga lakang nga ila dayong gihimo paggukod sa mga suspitsado?
•Nganong wa man mag-checkpoint ang kasilinganang mga lungsod nga posibleng giagian sa armadong grupo sakay sa puti nga van? ug
•Nganong gitumbok man dayon sa mga imbestigador nga politika o personal nga atraso ang namatyan sa mayor nga gipasanginlan ni Presidente Rodrigo Duterte nga drug protector?
***