Napandol nga panglaktod
Nadasig sa laktod nilang pagpalagpot sa katungdanan ni kanhi chief justice Maria Lourdes Sereno, nga inay ipaagi sa impeachment trial nga wa silay seguro makakuha ba sa gikinahanglan nga gidaghanon sa senator-judges nidangop sila sa segurong mayoriya sa Korte Suprema nga nitaktak ni Sereno pinaagi sa Quo Warranto, niumol ang mga sinaligan ni Presidente Rodrigo Duterte og mas laktod nga paagi paghipos sa tunok sa iyang pamunoan.
Gitumbok sa militar nga si Solicitor General Jose Calida maoy tigpasiugda. Apan kon unsa kamalampuson batok ni Sereno mao sab sila kapandol batok ni Senador Antonio Trillanes IV. Samtang gipasidunggan ni Presidente Duterte ang kautokan ni Calida sa pag-utingkay sa amnestiya ni Trillanes, ang pasiunang mga ebidensiya nagbisto nga taphaw ug dinalidali ang ilang pagpapirma sa presidente sa Proclamation No. 572 nga nagsugo sa pagpriso ni Trillanes.
Kuwestiyonable ang bugtong sukaranan sa proklamasyon: Ang certification ni Lieutenant Colonel Thea Joan Andrade, pangu sa Discipline, Law and Order Division sa Armadong Kusog, nga pinetsahan og Agosto 30, 2018, bisperas sa pagluwat sa proklamasyon, nga wa silay kopya sa aplikasyon ni Trillanes alang sa amnestiya. Kon nagpatabang pa lang unta si Calida sa kadagkoan sa militar, kagiyahan unta siya nga ang naghupot sa tanang dokumento ni Trillanes ug ubang kasundalohan di ang buhatan ni Andrade kon dili ang Office of the Adjutant General sa Kampo Aguinaldo.
Kon wa pa magkarakara, kahunghongan unta nga di madasigon ang militar nga modason sa bisan unsang pagsuway pagbasura sa amnestiya ni bisan kinsa kay hapit ang tanang haligi sa Armadong Kusog nakapahimus sab sa benepisyo.
Usa sa nahatagan og amnestiya ni kanhi presidente Fidel Ramos niadtong 1996 mao ang bag-o lang gitudlo ni Presidente Duterte nga hepe sa Armadong Kusog nga si General Carlito Galvez Jr. Kinsa napriso sud sa pito ka tuig sa Fort Bonifacio tungod sa pag-apil sa duguong kudeta batok ni anhing presidente Cory Aquino niadtong 1989.
Lahi sa mga pag-alsa ni Trillanes nga mas daghang press conferences, ang kudeta nga giapilan ni Galvez nipatay og 99, nisamad og 570 ug nisangpot sa lapad nga kadaot sa kabtangan ug patigayon nga nikabat og usa ka bilyon ka pesos.