Sugbo maigo sa hinungaw
Inig sud sa bagyong Ompong sa Philippine Area of Responsibility (PAR) karong udto, magsugod dayong uwan dinhi sa Sugbo ug Kabisay-an. Nipasabot si Direktor Oscar Tabada sa Philippine Atmospheric, Geophysical and Astronomical Services Administration (PAGASA) sa Kabisay-
an nga tungod ni sa kalapad sa langyab ni Ompong nga dako ang kahigayonan nga mahimong super typhoon.
Atol sa iyang pakighinabi sa dyAB Radyo Patrol, nitambag si Tabada nga angay’ng mangandam ang mga Sugbuanon ug kasilinganang mga molupyo sa Kabisay-an sa kusog ang uwan nga ilang mahiagoman karong adlawa, Miyerkules, ug ugma, Huwebes.
***
Magsugod ang kusog nga huros sa hangin dinhi sa Sugbo ug Kabisay-an karong Biyernes ug mas mokusog pa g’yud unya sa Sabado. Nangagpas si Tabada nga ang hangin nga mohapak dinhi sa ato may gikusgon nga gikan sa 30 ngadto sa 50 ka kilometro matag oras.
Kon mas mokusog pa g’yud ang hangin tungod sa Habagat nga mosamot pagkiat tungod ni Ompong, nipasidaan si Tabada nga mahimong moluwat ang PAGASA og gale warning nga mokanselar sa mga biyahe ug motanggong sa mga pasahero sa fast crafts gikan ug padung sa Sugbo ug silingang mga isla.
***
Tungod sa kusog nga hangin, nipahibawo si Tabada nga mohinay ang uwan sa Sugbo ug Kabisay-an sugod sa Biyernes hangtod sa Sabado. Makatabang ang mas kusog nga Habagat sa pagbugaw sa baga nga mga dag-om ug panganod palayo sa Sugbo ug Kabisay-an.
Sa gitakdang paggawas ni Ompong gikan sa PAR unya sa Domingo, magpadayon ang hinay nga uwan sa Sugbo ug Kabisay-an apan mopakita na ang adlaw. Samang kahimtang sa panahon ang maangkon unya sa Lunes.
***
Bisan kon mahimong super typhoon si Ompong (sa akong pagsuwat ini, niabot na og 210 ka kilometro matag takna ang iyang pag-unos), di siya sama kabangis sa bagyong Yolanda. Kay wa paabota si Ompong nga motugpa sa bisan asang bahin sa yuta.
Apan tungod sa kalapad sa iyang langyab, ug sa pagkusog sa iyang huros ug paghinay sa iyang irog, di kakumpiyansahan ang iyang uwan ug hangin. Angay’ng magbantay apan di angay’ng magyagaw ang mga molupyo sa Cagayan, Batanes, ug kasilinganang mga lalawigan nga maoy labing duol nga maagian ni Ompong karong Sabado.