Pataka nga pagpanudlo
Wa igdungog si kanhi Administrador Jason Aquino sa National Food Authority (NFA) nga humok og ulo sa mga sugyot sa economic managers ni Presidente Rodrigo Duterte. Usa ni sa mga hinungdan sa sibaw nga awhag sa mga sakop sa Kongreso nga alyado sa presidente sa pag-awhag sa
pagpalagpot niya sa katungdanan.
Apil sa awhag nilang Finance Secretary Carlos Dominguez ug kaubanan nga gibasura ni Aquino mao ang pagtugyan sa importasyon sa bugas humay ngadto sa pribadong mga negosyante inay nga monopoliyahon sa NFA nga maoy nakapaburot sa iyang P180 bilyones nga utang.
***
Bisan sa hingpit nga pagsalig ni Presidente Duterte sa iyang economic managers, nga way bisan usa nila nga natangtang bisan sa pagtibugsok sa peso ug pagburot sa inflation rate, mas sikit sa iyang kasingkasing si Aquino.
Kay lahi ni Dominguez nga igo lang nitampo sa gasto sa iyang kampanya, si Aquino usa sa pipila lang nga niawhag niya pagdagan pagka presidente niadtong 2014 dihang gibugal-bugalan pa ang iyang kahigayonan sa pagdaog. Di unta problema ang pagtan-aw og utang kabubut-on, apan ang katawhan maoy nagbaguod sa pagbayad sa iyang utang.
***
Bisan gipahibawo na sa presidente ang iyang pagbiya sa
NFA, wa pa mahuman si Aquino pagsukwahi sa economic managers: Wa niya ipatuman ang sugo sa Economic Development Cluster sa gabinete human niburot ang inflation rate ngadto sa 6.4% karong buwana nga ipagawas ang tanang NFA rice gikan sa mga bodega aron mobarato nang commercial rice.
Usa sa kataposang mga lakang ni Aquino sa wa pa mobiya sa NFA mao ang pag-anhi sa Sugbo aron pag-inagurar sa P33 milyones nga bodega, nga simbolo sa pagtipig inay pagpamaligya dayon sa NFA rice.
***
Kay di man lang si Aquino ang way bilib nila, ang economic managers nikumbinser sa presidente sa pagpirma og executive order (EO) aron mapugos ang NFA ug ubang mga ahensiya pagtuman sa ilang mga sugyot sa pagpabarato sa bugas humay ug ubang palaliton.
Ang draft sa EO gisumiter sa economic managers niadtong Septiyembre 12, usa ka adlaw human ipahibawo ang pagkatangtang ni Aquino. Usa ka semana nang nilabay, wa pay EO nga napirmahan. Kinsay nag-ingon nga nagapura sila pagpagaan sa palas-unon sa katawhan?