Luwason diay unta nila si Marcos?

Usa sa labing bakikaw nga bahin sa panagsulti nilang kanhi senador Bongbong Marcos ug kanhi senador Juan Ponce Enrile mao ang pagsubli sa pagpangu ni Enrile sa Reform the Armed Forces Movement (RAM) nilang Senador Gringo Honasan ug kaubanan sa pag-alsa batok sa pamunoan ni kanhi presidente Ferdinand Marcos.

Si Enrile nga maoy unang nihisgot sa insidente, nga wa niya ihimakak sama sa mga patay ug pagpanggukod sa mga nisukwahi ni Marcos, nagdumili unta sa paghatag og dugang detalye sa iyang giingon nga tinuod nga hinungdan sa pagbakwi sa ilang suporta sa diktadura. Nisamot kabakikaw ang panagsulti dihang niinsistir ang anak ni Marcos unsa man diay ang tinuod nga hinungdan sa ilang pag-alsa. Nipasabot si Enrile nga nagsugod ang kang-a nilang Marcos dihang nagsige na og sumbong ang mga heneral sa pagbansay-bansay sa RAM sa pagkatkat og tag-as nga buildings.

Matod ni Enrile gituman lang nila ang sugo ni Marcos nga mangandam sila batok sa mga terorista. Sa way paghisgot nituo ba si Marcos sa iyang katinawan, niingon si Enrile nga nisumiter siya sa iyang resignasyon isip ministro sa nasudnong depensa.

Ang sunod nga gibutyag ni Enrile klarong nakapakugang sa anak ni Marcos: Ang orihinal nilang plano sa RAM mao ra ang lunlon nga operasyon sa militar nga di maglambigit sa katawhan; ug nga di nila hilabtan si Marcos, iyang asawa, ug ubang mga sakop sa pamilya.

Nangangkon sab si Enrile nga ang ilang lakang gitumong di batok ni Marcos kon di ang pagluwas ni Marcos ug sa iyang pamilya gikan sa mga heneral nga nagtukod og military junta pagpahimus sa iyang kamasakiton.

Dihang nangutana ang anak ni Marcos kinsay nagtukod sa military junta, gitug-an ni Enrile ang ilang mga katungdanan: Mga hepe sa Armed Forces of the Philippines, Philippine Army, Philippine Air Force, Philippine Navy, ug Philippine Coast Guard.

Matod ni Enrile ang dinaliang hinungdan sa ilang paglihok mao ang plano sa junta pagtanggong sa tanang sakop sa gabinete ug pagpatay niya. Apan wa sila modayon pag-atake kay nahibaw-an diay sa Malakanyang ang ilang plano. Nitimang ang anak ni Marcos nga maayo rang wa sila mosung kay apil siya sa pangandam pagbuntog sa ilang pangatake.