Way makabaraw niya
Seryuso man o nagpasiaw lang sa iyang pag-angkon og kalambigitan sa bangis nga extrajudicial killings sa kampanya batok sa ilegal nga drugas, si Presidente Rodrigo Duterte nahibawo nga way makahikap niya. Gisigehan niya og kumbinser ang iyang kaugalingon nga bisan unsa pay iyang himuon ug bisan unsa ray iyang angkunon way makahilabot niya.
Kay di siya mahimong pasakaan og bisan unsang kaso sa kinatibuk-an niyang unom ka tuig nga termino. Unsa man tuod ang mahimo sa iyang mga biktima? Gawas sa pagsiyagit ug pagprotesta, giisip nga inutil ang iyang mga kaatbang.
* * *
Nahibawo si Presidente Duterte nga ang bugtong makapugong sa iyang pagpatuyang sa gahom mao ang demokratikanhon nga mga institusyon sa nasud. Ubos sa 1987 Constitution, gipalig-on ang Korte Suprema, ang Kongreso, ug ubang demokratikanhong mga institusyon tungod sa pait nga kasinatian sa diktadura ni Ferdinand Marcos nahimo silang mga itoy nga ginawongan sa Malakanyang.
Mao nga sa wa pa ilusad ang kampanya pag-usab sa batakang balaod, nga di lang mousab sa sistema sa gobyerno apan mopapas sab sa mga probisyon nga nipalambo sa tawhanong mga katungod, gipuntirya na sa presidente ang mga institusyon.
* * *
Kinsa pa may huwes nga mangahas sa pagtuki sa extrajudicial killings nga di mabalaka nga mahiagom sab sa laktod nga pagpalagpot ni kanhi Supre Court chief justice Maria Lourdes Sereno?
Kinsa pa man ang sakop sa Kongreso nga mangahas sa pagbarug pagpasangil og bisan unsang kahiwian batok sa presidente ug sa mga sakop sa iyang pamilya nga di managana nga mahisama sab nilang Senador Leila de Lima ug Senador Antonio Trillanes IV.
* * *
Bugtong gikabalak-an ni Presidente Duterte mao ang posibleng pagbakwi sa suporta sa militar ug kapolisan. Maong gidoble ang ilang suholan ug gibuhong sa ilang mga benepisyo. Nagtuo tingali nga way mahimo ang mga sibilyan kon lunod-patay niya ang armadong puwersa sa gobyerno.
Apan ang kahawod sa presidente may kinutoban. Kapin sa tulo ka tuig na lang ang nahibilin sa iyang termino. Maong karon pa lang nagsugod nang mga maniobra pagpanalipod niya ug sa iyang pamilya pinaagi sa pagtino nga iyang alyado ang mopuli sa Malakanyang o nga kalugwayan ang pagpabilin sa gahom lapas sa 2022.