40 ka patay matag adlaw
Kon nagtuo si Presidente Rodrigo Duterte nga ang iyang hapit matag adlaw nga panghudlat, pagpamalikas, pagpanginsulto ug pagpakauwaw ni bisan kinsa nga mangahas sa pagsaway sa duguon niyang kampanya batok sa ilegal nga drugas, nasayop siya.
Abunda ang mga pagtulon-an sa atong kasaysayan nga ang bisan unsang pangabuso sa gahom ug pagpangyatak sa tawhanong mga katungod di molahutay. Busa ang nagpakabana nga katawhang Pilipinhon di mahimong motahan sa pagbarug alang sa katarung bisan sa kasamtangan nga mga pagpanggukod nga ilang nahiagoman.
***
Usa sa mga pahinumdom nga di mahimong pug-ukon ang pakigbisog batok sa bangis ug pinatuyangan nga pagpanglaktod sa mga balaod sa nasud mao ang documentary nga “Philippines: Democracy in Danger” nga gisibya sa nagkalainlaing kanasuran sa kalibotan sa niaging semana.
Ang documentary sa British Broadcasting Corporation (BBC), usa sa labing ligdong nga kalibotanong institusyon sa pagbalita, nituki sa pag-atake sa presidente sa demokratikanhong mga institusyon nga makabadlong sa pagtukod og bag-ong diktadura, apil nang kampanya batok sa drugas ug pagpanggukod sa politikanhong oposisyon ug sa media.
***
Sa iyang kusganong pagsaway sa documentary sa BBC, gilista ni Foreign Affairs Secretary Alan Peter Cayetano ang mosunod nga mga nahimo sa kampanya batok sa ilegal nga drugas hangtod sa Agosto 31 ning tuiga:
•576 ang nadakpang mga opisyal ug kawani sa gobyerno, 498 nila gipaubos sa imbestigasyon, ug 105 ka mga polis ug sundawo ang gitaktak sa serbisyo; ug
•235 ka shabu laboratories ug drug dens ang nabungkag, P24.12 bilyones nga balor sa drugas ang nasakmit; ug 8,444 ka barangay ang naluwas gikan sa drugas.
***
Ambot gituyo ba o nataligam-an lang, wa mahisguti ni Cayetano ang ubang mga numero sa kampanya sa drugas, apil na ning gisumiter sa Philippine National Police (PNP) ngadto sa Korte Suprema:
•3,967 ka durugista ang napatay sa operasyon sa kapolisan gikan sa Hulyo 1, 2016 ngadto sa Nobyembre 27, 2017; ug
•16,355 ang napatay sa armadong mga tawo gikan sa Hulyo 1, 2016 ngadto sa Septiyembre 27, 2017.
Wa pang katubag ang PNP sa pangutana sa Labawng Hukmanan nganong wa matarung pag-imbestigar ang 20,322 ka kamatayon, o 39.46 ka patay matag adlaw sa kampanya batok drugas.