Si Palma ug duha ka heneral

Dihang nisuway sa kadagkoan sa Dakbayan sa Sugbo ug Commission on Human Rights pagpatabang ni Cebu Archbishop Jose Palma alang sa seguridad sa duha ka nakalingkawas sa pagpamusil sa Malubog, gipaandam sila sa posibleng pagkabawo. Nabalaka sila nga mobalibad si

Palma sa pagsukwahi sa kapolisan.

Sa ilang kakugang, gihangop ni Palma ang ilang hangyo. Gipaandam dayon ang mga lawak sa Archbishop’s Palace alang sa duha ka biktima. Naikog na hinuon ang taga City Hall ug CHR kay di pa diay makagawas dayon ang duha gikan sa Cebu City Medical Center.

***

Mapasaylo ang mga wa kaila ni Palma nga magduda sa kalig-on sa iyang baruganan. Kay ang iyang mga baruganan di sama kakusganon ug ang iyang mga sinultihan di sama kamabulukon sa ubang nituki sa mga kontrobersiya sa Simbahang Katoliko.

Apan di angay’ng masayop si Chief Superintendent Debold Sinas, hepe sa Police Regional Office sa Central Visayas, sa pagsalikway sa gihimo ni Palma, sama sa iyang ka way tahud sa ubang nisukwahi niya. Kay kapin na sa dekada ang nilabay, si Palma nibarug sab batok sa mas gikaintapan nga heneral.

***

Niadtong 2005, samtang Obispo pa sa Calbayog sa Samar, si Palma nisaway sa pagpangyatak sa militar sa tawhanong mga katungod. Sa iyang pastoral letter, giawhag ni Palma si kanhi Presidente Gloria Macapagal Arroyo paghunong sa di tawhanong kampanya sa militar sa Eastern Visayas.

Gipasanginlan ni Palma si Major General Jovito Palparan sa 8th Infantry Division nga responsable sa pagpatay, pagdagit ug pagkawagtang sa human rights advocates sa Samar. Nitanyag siya og pagkaon, tambal, sinina, ug pinuy-anan alang sa mga bakwet sa bangis nga mga operasyon ni Palparan.

***