Suwat ni Santo Padre Pio
Sa buhi pa, gitubag ni Padre Pio ang pangutana unsay mga lagda sa pagsud sa simbahan:
Sud sa simbahan sa kahilom uban ang dakong pagtahud, kay di takos pag-atubang sa Kabantogan sa Ginoo. Ang atong kalag mao ang templo sa Ginoo nga angay’ng ipabiling lunsay atubangan niya. Mauwaw ta
sa pagpasud sa yawa sa atong mga kasingkasing, busa namantsahan ang templo sa Ginoo nga naangkon pinaagi sa Bunyag.
Gamita ang Balaanong Tubig paghimo sa timaan sa Krus, luhod ug ihatag ang pasidungog sa imong kamatinudanon ni Hesus ug sa Balaanong Sakramento. Isumbong Niya ang mga panginahanglan nimo ug sa uban. Paundayoni ang imong kasingkasing, ug hatagi Siya sa hingpit nga kagawasan paglihok diha nimo sa unsay alang Niya labing maayo.
Kon motabang sa Misa, tarung og barug, luhod, ug lingkod. Kon mangaliya dungan sa uban, ayoha paglitok ang mga pung, hunong sa tukmang mga higayon, ug ayaw pagdali. Sa laktod, ang imong mga lihok angay’ng mahimong sumbanan sa uban aron maaghat sila pagbayaw ug paghigugma sa langitnong Amahan.
Sa pagbiya sa simbahan, panamilit ni Hesus sa Balaang Sakramento; pangayo sa iyang pasaylo ug bendisyon.
Gawas sa simbahan, angay’ng mahimong maayong sumusunod sa Nazareno. Pagpaubos, kay mao ni mithi nga mobutyag sa kaaghop sa kasingkasing. Angay’ng magpaubos sa pagsulti, sa pagkatawa, sa paglihuk-lihok, sa paglakaw. Angay’ng himuon di sa pagpaka-aron-ingnon kon dili sa kinauyokang mithi sa pagpaubos.
Pagpaubos sa kasingkasing, pagmatngon sa sinultihan, pag-amping sa imong mga tinguha. Ayaw pagbinuang ni bisan kinsa apan pagbinuotan sa tanan ug pagmatinahuron sa imong katiguwangan. Kanunay’ng ipabilin ang kamapaubsanon sa Labaw’ng Makagagahom nga, sa sulti ni Apostol Pablo sa mga taga Corinto, susama sa pagka suluguon.
Ayaw kalimti kining Balaanon nga sumbanan. Suwayi pagtan-aw ang mahigugmaong kabantogan sa Iyang presensiya, ang mahinangpong gahom sa iyang pagsulti, ang yanong kaligdong sa paglakaw, sa pagpamalandong, sa pagsulti; ang tam-is nga kagaan sa dagway.
Palandonga ang pinahimutang niyang pagdapit sa katawhan, gikan sa mga dakbayan ug mga kastilyo, paingon sa kabukiran, sa kalasangan, sa awaaw nga kabaybayonan, hinikalimtan ang pagkaon, mainom ug ilang mga gimbuhaton.
Mosuway ta pagsunod, kutob sa mahimo, sa iyang kamapaubsanon. Himuon natong tanan aron mahisama niya dinhi sa kalibotan, aron masusama ta niya sa langitnong Gingharian.