Mga kabilin ni Padre Pio
Nanamilit nang mga Sugbuanon sa wa madugta nga kasingkasing ni Santo Padre Pio nga nigikan na karong buntag alang sa Davao. Ang kalaworan sa katawhan nga nakakita ug nakahawok sa tipik sa iyang kabalaanon natandog sa tibuok niyang kinabuhi sa pag-antos ug pangilaba.
Kabilin ni Padre Pio ang mosunod nga pipila lang sa bililhong mga pagtulon-an sa iyang tubag sa mga suwat sa katawhan sa nagkalainlaing kanasuran:
Pangaliya ang labing gamhanan natong hinagiban, ang yawe nga makaabli sa kasingkasing sa Ginoo.
Ang Ginoo nahigugma sa tawo sa gugmang way kinutoban ug kon mosilot siya iya ning himuon nga puno sa kaikog, nga morang mahadlok siyang makapasakit.
Ang kapakyas sa pagtabang sama sa pagsamad sa Ginoo sa iyang kalimutaw. Unsa may mas tandugon kay sa kalimutaw sa mata? Ang kapakyas sa pagtabang maoy kapakyas batok sa kinaiyahan.
Ang kinatumyan sa pamalandong mao ang gugma sa Ginoo ug sa imong silingan. Higugmaa ang una uban ang tibuok nimong kalag nga way panagana, higugmaa ang ikaduha sama sa imong kaugalingon, ug imong maabot ang kinapungkayan sa pamalandong.
Ang mga tentasyon, kaluya ug kalibog maoy kahimanan sa kaaway. Hinumdomi ni: kon ang yawa magsabasaba timaan na nga naa pa siya sa gawas ug wa pa makasud. Ang atong kahadlokan mao nga mahiluna na siya sa tawhanong kalag.
Ang demonyo usa ray pultahan pagsud sa atong kalag: ang kabubut-on. Way sala nga mahimong sala kon wa himoa uban ang kabubut-on. Kon way kabubuton, way sala, kon dili tawhanon lang nga kahuyang.
Ayaw kahadlok. Si Hesus mas gamhanan kay sa tanang impiyerno. Sa paglitok sa iyang ngan ang tanang tuhod sa langit, kalibotan ug impiyerno mapiko atubangan ni Hesus; mao ni ang pasalig sa maayo ug kahadlokan sa daotan.
Ang labing maayong mga paagi sa pagpanalipod sa imong kaugalingon gikan sa tentasyon mao ang mosunod: bantayi ang imong kahimatngon aron maluwas gikan sa tentasyon, likayi ang garbo, ayaw ibayaw ang imong kasingkasing, kumbinsiha ang imong kaugalingon sa kayawan-on sa pagpasagad, palayo sa kasilag, pangaliya kutob sa mahimo.
Ang gugma ug kahadlok kinahanglang maghiusa, ang kahadlok nga way gugma mahimong tinalawan. Ang gugma nga way kahadlok magpatuyang, sa way pagmatngon asa mosangko.