Trade war, lana, ug karma
Labing klarong timaan nga wa kahibawo, o nagdumili lang sa pagsabot, si Presidente Rodrigo Duterte sa pagsulbong sa presyo sa mga palaliton, nga nakapa-apiki pag-ayo sa kinabag-an sa katawhang Pilipinhon, mao ang nag-usab-usab niyang katin-awan sa tinuod nga kahimtang sa ekonomiya sa nasud.
Sa unang pagsulbong sa presyo sa bugas humay, nga niabot na og P70 matag kilo sa pipila ka bahin sa iyang kaugalingong nataran sa Mindanao, nipasalig ang presidente nga way krisis sa bugas humay kay gipaburot lang ang problema sa samokan niyang mga kaatbang sa politika.
Dihang natakdan na og sulbong ang presyo sa ubang inadlaw nga mga palaliton labi na sa mga pagkaon, nga gitulisok nang excise tax sa mga produkto sa lana nga gipahamtang sa iyang Tax Reform for Acceleration and Inclusion (TRAIN) Law, nausab ang katin-awan sa presidente:
Gibasol niya ang gubat sa patigayon nga gideklarar ni US President Donald Trump batok sa China, bisan kon pulos pa lang pasidaan ang trade war ug wa pay bisan usa ka nasud nga nakabatyag sa epekto, apil nang mga ekonomiya sa Estados Unidos ug sa China.
Karong bag-o, niangkon na si Presidente Duterte nga way mahimo ang iyang pamunoan sa pagpa-ubos sa inflation rate ug presyo sa mga palaliton kay, lahi sa adunahan nga silingan natong mga nasud, way lana ang Pilipinas.
Nataligam-an sa presidente nga nakabaligya ang Pilipinas og kapin sa upat ka milyon ka baril sa lana karong tuiga gikan sa Alegria sa Sugbo ug Malampaya ug laing tulo ka tinubdan sa Palawan. Ug nga pipila sa adunahan natong mga silingan maoy tinuod nga way lana.
Ambot nganong way nakahunghong sa presidente nga hingpit nga makapawa sa iyang ka-katuohan kon magpadayon ang pag-usabusab sa iyang mga istorya. Di lang mahitungod sa ekonomiya kon dili hasta sa pag-itom sa iyang nawong:
Una, niingon nga napagod sa kampanya sa kabukiran sa iyang kandidatura niadtong 2016 ug sa pagbalibad sa sunblock; dayon nibutyag nga na-initan siya sa disyerto sa pagduaw sa Israel ug Jordan sa niaging buwan; unya nibasol sa cream sa iyang kapuyo nga si Honeylet; ug karong bag-o niangkon na nga mahimong naigo siya sa karma.