Pasalig nga pulos pakyas
Sa makausa pa, nabawo ang mga konsumidor. Wa matuman ang gipasalig ni Agriculture Secretary Manny Piñol nga pag-us-os sa presyo sa commercial rice tungod sa Suggested Retail Price (SRP) sa bugas humay ug ubang produkto sa agrikultura. Mapagarbuhon niyang gipahibawo nga P44 na lang ang labing mahal nga bugas humay sa kamerkadohan sugod niadtong Oktubre 23, Martes sa niaging semana.
Apan Oktubre 29 na lang nagpabiling P50 pataas ang presyo sa kasagaran sa commercial rice sa kamerkadohan sa Sugbo ug Kabisay-an. Hain na man ang pasalig ni Piñol?
***
Sama sa naandan, nasobrahan diay ang pagarpar ni Piñol. Human gipahibawo ang SRP sa bugas humay human sa tigom sa mga negosyante niadtong Oktubre 18, nitiyabaw ang mga mamaligyaay nga di una ipatuman ang SRP kay wa pa mahurot ang ilang karaan ug mas mahal nga stock.
Gawas pa, ang sulti ni Piñol wa diay ipasikad og sinuwat nga kamandoan. Niadto pang Oktubre 24 siya nipirma sa National Food Authority (NFA) Memorandum Circular AO-2018-10-002. Nga mapatuman 15 ka adlaw human sa publikasyon. Ug kay niadto pa mang Oktubre 26 namantala, unya pa sa Nobyembre 10 mo-epekto.
***
Di pa na mao. Ang memorandum circular nga gipirmahan ni Piñol isip tsirman sa NFA Council di maglakip sa Sugbo, Kabisay-an, ug Mindanao kay adto ra ipatuman sa Metro Manila, Bulacan, Laguna, ug Cavite. Ambot nganong si Piñol, nga samang Presidente Rodrigo Duterte taga Mindanao man unta, nikalawat sa sayop nga pagtuo nga angayng unahon ang kaulohan ug ipa-uwahi ang ubang mga lalawigan.
Sa ato pa, way klaro kanus-a mapatuman ang SRP sa bugas humay ug ubang mga produkto sa agrikultura dinhi sa ato. Kay kon motiyabaw na sang mga negosyante, nga klarong mas sikit sa kasingkasing ni Piñol kay sa kabos nga mga konsumidor, way garantiya nga di siya molikoy.
***
Manghinaot na lang ta nga mahinayon ang pasalig sa NFA, nga maoy labing uwahi sa mga saad nga pulos napakyas, nga mokanaog og P3 matag kilo ang bugas humay sa pagtapos ning buwana.
Ang pasalig giluwatan ni Regional Director Fernando Nuñez sa NFA Central Visayas nga nipahibawo sa pagbaha sa kamerkadohan sa lokal nga ani ug imported nga bugas humay.