Bag-ong kiay sa cha-cha
Ang pagtukod ni Presidente Rodrigo Duterte og bagong task force nga mosangyaw sa Charter Change maoy pag-ila sa kamatuoran nga ang labing dakong babag sa iyang giduso nga kausaban sa konstitusyon ug sistema sa gobyerno di ang iyang politikanhong mga kaatbang kon dili ang katawhang Pilipinhon.
Kay ang makabungog nga kinabag-an sa katawhan padayong nisalikway sa federalismo bisan sa iyang pagaleluya ini nga maoy bugtong manluluwas sa nasud ug sa katawhan gikan sa kakabos ug ubang mga tunglo. Nahibawo siya nga kon way suporta sa katawhan di niya malaktod ang proseso.
Wa siyay problema sa House of Representatives. Tungod sa hingpit niyang pagkontrolar sa mga kongresista, nagbuot-buot gud ang bag-ong speaker nga si kanhi presidente Gloria Macapagal Arroyo sa paghimo og iyang kaugalingong bersiyon sa konstitusyon nga lahi sa girekomendar sa mga tinudlo ni Presidente Duterte sa consultative committee nga gipangulohan nilang kanhi chief justice Reynato Puno ug kanhi Senate President Nene Pimentel.
Way tuyo si Arroyo sa pag-insulto sa presidente ug sa iyang mga tinudlo. Nasobrahan lang ang iyang pagsalig nga makalusot ang bag-ong batakang balaod bisan unsaon pa nila og tabas.
***
Labing dakong labad sa ulo sa presidente mao ang Senado. Kansang minority bloc, nga klarong gipaluyohan sa mayoriya sa majority bloc, nideklarar nga way kausaban sa konstitusyon sa di pang piniliay sa Mayo 13, 2019.
Bugnaw ang mga senador kay sa gisugyot nga kausaban sa konstitusyon malasaw ang ilang gahom, mabira sila paubos nga tupong na lang sa mga kongresista sa termino, pundo, ug mga benepisyo.
Maong nangampanya si Presidente Duterte alang nilang Bong Go ug Bato dela Rosa aron makuha nang hingpit nga mayoriya sa Senado. Apan way makaseguro unsay dangatan sa iyang mga gipaluyohan, labi na kay wa pa masulbad ang pagsulbong sa presyo sa inadlawng palaliton.
Maong dako gihapon ang tentasyon sa pagpanglaktod. Nga mahimo lang kon laktawan ang Senado. Apan bisan sa kamaru ni Speaker Arroyo, kon ang kinabag-an sa katawhan di mobalitok paggakos sa federalismo, di makalusot ang cha-cha. Busa ilang gipanghinaot nga ang pinatuyangan nga propaganda pinaagi sa Inter-Agency Task Force on Federalismo mas epektibo kay sa bastos nga kanta ug sayaw ni Mocha Uson.