Pagtibugsok sa kakatuohan
Ang pagbakwi ni Presidente Rodrigo Duterte sa iyang gimando nga military takeover sa Bureau of Customs (BOC) maoy pag-angkon sa dako niyang kasaypanan. Kay sukwahi sa iyang orihinal nga plano gidid-an diay siya sa 1987 Constitution sa pagtudlo sa mga sundawo sa aktibong serbisyo ngadto sa sibilyan nga mga katungdanan.
Apan kay wa man siya gasahi sa mithi sa pagpaubos, di moangkon ang presidente sa iyang sipyat. Hinunoa, gitulisok na sab ang mga naminaw niya nga maoy nasayop sa paghubad sa tinuoray nga kahulogan sa iyang mga gipanulti.
***
Karon niingon na ang presidente nga ang iya diayng gipasabot sa pagpahimutang sa floating status sa tanang kawani sa BOC aron pulihan sa mga sundawo mao nga:
Ang department heads ug section chiefs ra sa BOC ang iyang tangtangon ug mopuli pagtuman sa ilang mga gimbuhaton ang ilang mga pangabaga; ug
Ang mga sundawo igo ra diayng moabag sa mga sibilyan, labi na sa scanning sa mga kargamento, aron pagtino nga di na malutsan pag-usab ang ilang x-ray department sa mga kontrabando sama sa P11 bilyones nga shabu shipment sa Cavite.
***
Liwas na sa Kalagkalag nga nausab ang baruganan sa presidente. Kay human sa iyang pagmando sa military takeover niadtong Oktubre 28 sa Dakbayan sa Davao, gidasonan man niya nga militarisasyon sa BOC ang iyang tuyo sa iyang pakigpung niadtong Oktubre 31 sa Dakbayan sa Cagayan de Oro.
Klarong natandog ang presidente sa mga pagsaway sa mga eksperto sa balaod. Sama nga nakumbinser sa pagkumpisal sa iyang mga sinaligan nga tinuod nga ilegal ang military takeover sa BOC.
***
Ang nahimo nang taras ni Presidente Duterte nga pagsud-gawas sa iyang mga pamahayag di makapatibugsok sa iyang popularidad. Di mapapas sa iyang pag-atras-abante ang pagsalig sa kinabag-an sa katawhan niya. Ang kapin sa duha ka tuig nga pag-usabusab sa iyang mga sugo di pa igong sukaranan pagbakwi sa katawhan sa ilang suporta.
Apan bisan ang labing taas nga popularidad, sama sa bato nga bantilis nga matunaw sa makanunayon nga dagayday sa tubig, motibugsok sa sunudsunod nga pataka nga mga pamahayag. Ug kon mahitabo na, bisan si Presidente Duterte di nang kapugos sa katawhan sa pagtuo niya pag-usab.