Pagsubli sa plitehan
May kahigayonan nga mo-us-os na sab ang presyo sa lana sunod semana. Sa ikalimang sunudsunod na nga semana, padayong nitidlom ang presyo sa lana sa merkado sa kalibotan. Mao nga, gawas lang kon simbako may dakong kaguliyang nga mokalit lang og ulbo sa tungatungang sidlakan o sa ubang mga nasud nga tinubdan sa lana, mahimong makapahimus ang mga motorista og laing laslas sa presyo sa krudo ug gasolina sa Lunes o Martes.
Atong pasalamatan ang duha ka nagkadungan nga mga panghitabo nga nakapabarato sa lana: Pagsulbong sa suplay ug pagtidlom sa demanda.
Ang padayong pagtidlom sa presyo sa lana dako og epekto sa uminto sa plitehan nga gipatuman na sa Land Transportation Franchising and Regulatory Board (LTFRB) sa Metro Manila ug ubang rehiyon ug sa nag-ung-ong pa nga mga petisyon sa transport groups sa Sugbo ug Central Visayas.
Gisanong na sa LTFRB ang sugo ni Transportation Secretary Arthur Tugade sa pagsubli sa mga uminto sa plitehan. Gipaabot nga di na sab sila mag-apura sa pagtugot sa uminto sa plitehan sa public utility jeepneys (PUJs) ug buses dinhi sa ato.
Nga maayong balita alang sa mga pasahero sa Sugbo, Bohol, Negros Oriental, ug Siquijor apan daotang balita alang sa mga drayber sa mga sakyanang pamasahero. Kay bisan madayon pang ikalimang semana sa sunudsunod nga pag-ubos sa presyo sa lana sunod semana di pa gihapon mapapas ang bug-at nilang palas-unon sa siyam ka sunudsunod nga semana sa uminto hangtod sa niaging buwan.
Di hinuon silang kapaabot og simpatiya gikan sa mga pasahero. Labi nang PUJ drivers nga nagdumili pagsensiyo ug pag-insistir sa P7 inay P6.50 nga minimum nga plitehan.
Ang makalilisang nga pagsulbong sa presyo sa lana sa niaging buwan nanukad sa konsabo sa paglaslas sa produksiyon sa OPEC nga gipangulohan sa Saudi Arabia ug sa non-OPEC countries nga gipangulohan sa Russia.
Samtang ang dakong pagtidlom sa presyo sa lana karon nanukad sa pagsulbong sa produksiyon sa Estados Unidos ug sa OPEC ug non-OPEC countries sa tinguha nga matapakan ang dakong haw-ang nga mamugna sa pagbanhaw ni US President Donald Trump sa pagdili sa pagpamaligya sa Iran og lana ngadto sa ubang kanasuran.