Pinugsanay nga debate
Uyon ko sa balaudnon nga mopugos sa mga magpapili sa lokal ug nasudnong mga piniliay sa pagsalmot sa mga debate nga pasiugdahan sa Commission on Elections (Comelec). Gipasaka ni Kongresista Rav Rocamora sa Siquijor ang House Bill No. 8594 aron kahatagan ang mga botante og igong kasayuran sa mga plano ug sa kalidad sa liderato sa mga magpapili.
Masaligon si Rocamora nga kon mahimo ning balaod mapalambo ang demokratikanhong proseso kay kahatagan ang katawhan sa kahigayonan sa mas matinud-anon nga pagsusi sa katakos sa mga magpapili ug pagtino nga ang mga labing haom maoy makahupot sa mga katungdanan.
***
Niawhag si Rocamora nga ibasura sa Comelec ang kandidatura sa mga magdumili sa pagsalmot sa debate. Kini aron mapugos ang mga magpapili sa pag-seryuso sa ilang obligasyon sa pag-atubang sa mga botante. Mapasaylo lang ang di pagtambong kon ma-ospital o mapriso.
Ubos sa balaudnon, ang Comelec mopasiugda sa mga debate uban sa labing menos tulo ka civic o people’s organizations. Uyonan sa tanang magpapili ang oras, adlaw, dapit, ug mga lagda sa mga debate. Nga kinahanglang maglakip sa ilang mga proyekto ug mga programa ug baruganan sa mahinungdanong mga isyu sa piniliay.
***
Sa nangaging mga piniliay, nagpasiugda ang Comelec og mga debate apan kasagaran alang lang sa mga nagpapili sa nasudnong mga katungdanan. Kutob ra ang Comelec sa pagdapit apan way gahom sa pagpugos sa tanang mga magpapili sa pagtambong.
Nihit ang mga debate sa Comelec ug ubang kahugpongan alang sa mga magpapili alang sa lokal nga mga katungdanan. Nibalibad ang mga incumbent nga masaligon na sa ilang kadaogan ug ang mga nagpapili nga di maayong makiglalis.
***
Nagdumili si kanhi Cebu City Mayor Mike Rama sa pakig-debate ni Mayor Tommy Osmeña niadtong 2016. Mahimong naleksiyon sa pagkapilde sa incumbent nga si Boy Cuenco human nakig-debate ni Osmeña niadtong 1998. Si Osmeña mismo nibalibad sa pakig-debate ni Atan Guardo niadtong 2010.
Ambot maaprobahan ba alang sa piniliay sunod tuig, apan daghan nang nanghinaot nga magkadebate silang Agnes Magpale ug Gwen Garcia, Luigi Quisumbing ug Jonas Cortes, Tommy Osmeña ug Edgar Labella, Boy Radaza ug Ahong Chan, Bebot Abellanosa ug Joy Pesquera, ug Raul del Mar ug Richard Yap.