Patuyang nga paburot sa ginansiya
Wa na g’yuy sukaranan ang mga negosyante sa pagpasaka sa ilang presyo karong Pasko ug bag-ong tuig. Gawas sa kahakog. Wa na gyud silay maggamit nga hinungdan sa pagpaburot sa presyo sa mga produkto para sa noche buena ug mga gasa ug ubang panginahanglan sa Christmas parties ug pagsugat sa 2019. Gawas sa pagpahimus.
Gipahibawo sa Department of Trade and Industry (DTI) nga gipasaligan sila sa labing dagkong manufacturers nga di sila mopasaka sa presyo sa ilang mga produkto nga labing himalitan sa mga konsumidor dayong Disyembre karong tuiga. Apan wa pa gani mauga ang laway sa taga DTI, nipahibawo nang mga pabrika sa sardinas nga mopasaka sa ilang presyo og P0.60 matag lata sugod sa sunod buwan. Gipasabot ni Marvin Lim, presidente sa Canned Sardines Association of the Philippines, nga tungod ni sa pagsaka sa presyo sa lana ug pagtibugsok sa peso atubangan sa dolyar.
Inay mosupak, gisabot sa kadagkoan sa DTI ang nag-ung-ong nga dakong uminto sa presyo sa sardinas, nga di lang himalitan sa Pasko ug bag-ong tuig kon dili mao g’yuy inadlawng panginahanglan sa tibuok tuig.
Ang pait nga kamatuoran mao nga ang kadagkoan sa DTI tua kapusta sa mga negosyante inay sa mga konsumidor. Samtang sila ang gitahasan sa pagbantay sa presyo sa mga palaliton, mga negosyante ang kakuyog sa inadlawng kalihokan.
Maong lisod pasabton ang taga DTI sa kaapiki sa mga konsumidor, daghang salamat sa gagmayng suholan nga gitabangan nila og lansang isip sakop sa regional wage boards. Mas sayon silang pasabton nga di krimen ang pagpaburot sa ginansiya sa mga negosyante.
Busa bisan ika-unom na ning sunudsunod nga semana sa pagtibugsok sa presyo sa mga produkto sa lana, bisan padayong nilig-on ang peso atubangan sa dolyar, ug bisan gisuspenso na sa Malakanyang ang dugang excise tax sa lana sugod sa bag-ong tuig, way garantiya nga di mosaka ang presyo sa mga palaliton.
Kay mga negosyante ray magbuot pilay tubo nga ipatong sa ilang mga baligya. Pagmatuod kinsay tinuod nga hawod, way kukaikog nga gitahan sa DTI ngadto sa labing dagkong mga negosyante ang gahom sa pagtakda sa suggested retail price sa inadlawng mga panginahanglan.