Pinalabing sari-sari nga kontraktor
Way proyekto sa Sugbo ang C.T. Leoncio Construction and Trading nga mao karon ang sentro sa kontrobersiya sa nalangay nga nasudnong budget alang sa sunod tuig. Ang kompaniya kansang buhatan gilista sa Google nga naa sa 171 Luwasan Street, Guyong, Santa Maria, Bulacan, gipasanginlan nga nakasipong nang daan sa binilyon ka pesos nga proyekto bisan wa pa maaprobahi ang budget sa 2019.
Maong nangita dayon ko sa posibleng presensiya sa kompaniya dinhi sa Sugbo ug Central Visayas. Wa sila igkita dinhi. Apan nalukop nilang Luzon. Niabot sab sa Davao. Giwara-wara ni House Majority Leader Rolando Andaya ang kompaniya nga iyang gihulagwayng “sole proprietorship” sama sa sari-sari store nga may koneksiyon sa Malakanyang aron pagsagang sa mga pangatake batok sa House of Representatives:
•Gipasanginlan silang Senador Ping Lacson nga nipadayon sa pork barrel pinaagi sa pagbubo og binilyon ka pesos nga pundo sa mga distrito nilang Speaker Gloria Macapagal Arroyo ug sa mga alyado; ug
•Gipasidan-an silang Budget Secretary Benjamin Diokno nga dul-an sa tunga sa milyon ka Pilipinhon ang lamyon sa katimawa tungod sa kalangay pagpasar sa 2019 budget. Way mga hulagway sa Sugbo ang ginganlan ni Andaya nga tag-iya sa kompaniya nga si Consolacion Tubuhan Leoncio. Apan gilista siya sa Bureau of Internal Revenue nga ika-205 sa 500 nga labing dako og nabayrang buhis: Niabot og P12,338,708.00 ang iyang income tax sa 2014.
Nagsunod siya nilang Senador Manny Pacquiao (P210,305,927.00) ug Kris Aquino (P54,530,635.00) apan nag-una sa tag-iya sa Jollibee nga si Tony Tan Caktiong (P12,046,270.00) ug sa tagduma sa Cebu Pacific nga si Lance Gokongwei (P11,823,378.00).
***
Gawas sa gibisto ni Andaya nga pagsipong sa C.T. Leoncio Construction and Trading og 30 ka proyekto sunod tuig, napamatud-an nga ang kompaniya usa sa pinalabing kontraktor nga labing daghan og mga proyekto sa pamunoan ni Presidente Rodrigo Duterte sa katungdanan.
Way labot sa ilang nakuha karong tuiga ug sa sunod tuig, dul-an sa upat ka bilyon ka pesos (P3,987,573,175.22) na ang ilang transaksiyon sugod sa Hulyo 2016 hangtod sa Disyembre 2017.