54 anyos nga gapos
Ang labing komprehensibo nga balaudnon sa paglegalisar sa operasyon sa mga habal-habal dinhi sa Sugbo ug ubang bahin sa Pilipinas gipasaka sa Kongreso kapin sa dekada na ang nilabay. Bisan wa mapasar, gilab-as ang maong balaudnon sa matag lingkod sa bag-ong Kongreso. Apan wa gihapoy nahitabo.
Way nangahas sa kinabag-an sa mga kongresista ug mga senador sa pagsukwahi sa baruganan sa nasudnong gobyerno nga di mahimong tugotan nga mamasahero ang mga motorsiklo tungod sa dakong risgo sa kadalanan ug kay, labing mahinungdanon, malapas ang Republic Act 4136, o Land Transportation and Traffic Code, nga naumol niadtong Hunyo 20, 1964, o kapin sa lima ka dekada na ang nilabay.
Pipila ka probisyon sa balaudnon pag-ila sa kamapuslanon ug paghimong mas luwas sa habal-habal:
• Ang local government units (LGUs) maoy mohatag og prangkisa sa habal-habal;
• Makalabang apan di makasubay sa nasudnong highway ug di molapas sa 40 ka kilometro matag oras ang dagan sa habal-habal;
• Ang tag-iya sa habal-habal kinahanglang mokuha og insurance alang sa third party liability; ug
• Ang aplikante sa prangkisa mosumiter og rehistrasyon sa motorsiklo ug certification sa barangay kapitan nga molupyo siya sa barangay.
***
Ang House Bill 1107 o Motorcycle-for-Hire Act gipasaka ni Kongresista Red Durano sa ikalimang distrito sa Sugbo niadto pang 2007. Kauban niyang nangamahan sa balaudnon silang kanhi kongresista Pablo Garcia sa ikaduhang distrito sa Sugbo ug kanhi kongresista Edgar Chatto sa unang distrito sa Bohol ug kanhi senador Noynoy Aquino.
Kapila na lang magbalikbalik sa Kongreso si Durano, niretiro na si Garcia, na-gobernador na lang sa Bohol si Chatto ug na-kanhi presidente na lang si Aquino, nagpabiling ilegal ang habal-habal.
Ang labing dakong babag mao ang 54 anyos na nga balaod, ang R.A. 4136, nga nagdili sa motorsiklo sa bisan unsang sirkumstansiya nga paabangan o pasakyan og mga pasahero ug kargamento nga may plitehan.
Ambot nganong padayon tang magpagapos sa balaod nga naumol sa tuig nga may gubat pa sa Vietnam, buhi pa ug nahatagan sa Nobel Peace Prize si Martin Luther King Jr., mao pay pagpakasal nilang Elizabeth Taylor ug Richard Burton sa labing unang higayon, buhi pang upat ka Beatles, ug hawod pang tartanilya sa Sugbo.