Natanggong sa mga lagda
Nakabantay ko og dakong kang-a sa mga panglantaw sa mga hingtungdan sa nitumaw nga krisis sa mga basura sa mga tambalanan sa Metro Cebu. Nga bisan sa pipila na ka tigom nga ilang gipahigayon nagpabilin nga wa matapaki. Maong nagkadako ang hulga sa kahimsog sa katawhan.
Sa buwag nakong pakighinabi sa kadagkoan sa Environment Management Bureau (EMB), Department of Environment and Natural Resources (DENR), ug Department of Health (DOH) ug sa mga tagduma sa pipila ka tambalanan ug service providers, nahadlok ko nga hangtod karon wa g’yud sila magkasinabtanay.
***
Unang niisa sa alarma sa nagsugwak na nilang mga basura mao ang mga tagduma sa labing dagkong tambalanan nga nidangop ni DOH-7 Director Jaime Bernadas. Apan gipasaligan dayon silang ni EMB-7 Regional Director William Cuñado nga nasulbad nang krisis kay duna nay permiso ang duha ka labing dagkong service providers.
Sakto si Cuñado nga nahatagan na og permiso sa ilang ulohang buhatan ang Aquilini Mactan Renewable Inc. sa Lapu-Lapu City. Apan ako sang nahibaw-an gikan ni DENR-7 Regional Executive Director Gilbert Gonzales nga di pa ka-operate ang Aquilini.
***
Samtang sakto si Cuñado nga nahatagan na nila og permiso ang Pollution Abatement Systems Specialists Inc. (PASSI) nga maoy tigtipig sa mga basura sa kasagaran sa mga tambalanan sa Metro Cebu, apan wa pa makapangolekta ang PASSI hangtod karon.
Kay nagkinahanglan diay og buwag nga mga permiso ang mga tambalanan sa di pa makuha ang ilang mga basura. Ug segun ni PASSI Pollution Control Officer Irene Donoso ang mga aplikasyon sa mga tambalanan natanggong sa EMB sud na sa pila ka buwan.
***
Nipasalig si Direktor Gonzales nga wa tuyoa ang kalangay sa EMB. Mahimong tungod lang g’yud sa kapakyas sa mga tambalanan sa pagtuman sa tanang panginahanglan. Nipasabot sab siya nga di mahimong paluagan ang ilang mga lagda kay mananakod ang mga basura sa mga tambalanan ug busa mameligro ang kahimsog sa publiko.
Hinaot nga may makada og buot ug magkaabot na sila. Kay pito ka buwan nang nagtumpi ang makahilong mga basura. Nga bisan si Direktor Bernadas wa na magpaabot nga motug-an niya sa tinuod ang mga tambalanan giunsa paghipos ang ilang mga biya.