534 ka bag-ong isla

Ang bisan unsang kabalaka sa mga tigpasiugda may manambong ba sa ilang kalihokan mahimong napapas na sa nagbaha nga atensiyon nga nadani sa ilang pagdapit: Tukion sa Philippine Geomatics Symposium sunod buwan mao ang pagdaghan sa naihap nga mga isla sa Piipinas gikan sa 7,107 ngadto sa 7,641.

Sama sa naandan sa social media, gisugat ang pahibawo sa tumang kahinangop, sa way kinutobang pagduda ug

way kapuslanan nga mga bugalbugal. Mabatyagan sa mga tigpasiugda sa mosunod nga mga adlaw kon mosulbong ba ang halin sa ilang mga tiket sa kalihokan.

***

Nakahimong mas bug-at sa pangangkon sa pagkakaplag sa 534 ka bag-ong isla sa Pilipinas mao pahibawo sa mga tigpasiugda nga ang kasayuran natino sa National Mapping and Resource Information Authority (NAMRIA). Pinaagi sa paggamit sa Interferometric Synthetic Aperture Radar nga mas takos nga makakita sa nag-usab-usab nga bayhon sa kayutaan sa kadagatan.

Ang NAMRIA nga ubos sa Department of Environment and Natural Resources di kapasanginlan og fake news. Kay maoy opisyal nga tighimo og mga mapa sa Pilipinas ug tig-apud-apod sa kasayuran mahitungod sa atong katigayonan sa kinaiyahan.

***

Ang Philippine Geomatics Symposium ug International Conference on Geoinformation Advances sa Manila unya sa Nobyembre 14 ug 15 pasiugdahan sa University of the Philippines Department of Geodetic Engineering ug sa University of the Philippines Training Center for Applied Geodesy and Photogrammetry.

Gisugdan niadtong 2012 ang tinuig nga tigom sa geospatial technology developers, researchers, professionals, users, ug mga tinun-an maminaw sa mga eksperto sa nagkalainlaing kanasuran sa bag-ong mga teknolohiya pagsulbad sa kalibotanong mga suliran.

***

Pipila sa mga pangutana nga gipasupot nang daan ug gipanghinaot nga matubag sa kalihokan:

•Naapil ba sa bag-ong ihap ang mga islang giangkon sa China ug nasumpay sa mainland tungod sa pinatuyangang reclamation projects?;

•Unsa may kapuslanan kon di gihapon magtagad ang gobyerno pagpanalipod sa mga isla gikan sa pangangkon sa ubang kanasuran?;

•Pila na man sab ka dekada ang paabuton una matudlo ang bag-ong kasayuran sa textbooks ug mga eskuylahan?; ug

•Magpatuyang na ba sab paglawog sa mga isla ngadto sa mga turista sa way pagpahimutang og panagang sa mga basura ug ubang panamastamas?