13 anyos na ang listahan
Kinaham nga pasalig ni Cebu City Mayor Edgar Labella sa matag suliran nga masugatan ang paglusad og imbestigasyon. Daghan nang imbestigasyon nga gisaad apan hangtod karon, kapin sa tuig human nibanos sa katungdanan, way klaro unsay sangpotanan.
Apan duna siyay gisaad nga imbestigasyon nga nahingpit
sud sa usa ka adlaw: Niadtong Martes, Hunyo 30, nisaad siyang Annie Perez sa TV Patrol Central Visayas nga susihon kon sayop bang listahan sa Department of Health (DOH) nga gipasikaran sa gidaghanon sa bag-ong quarantine pass. Niadtong Miyerkules, Hulyo 1, niinsistir siyang sakto ang listahan.
* * * Sa ilang pagpanubag sa mga pangutana sa media human sa tigom sa Inter-Agency Task Force (IATF) dinhi sa Sugbo, gisukna si Labella sa kamakiangayon sa ilang pagprinta og 178,000 ka passes bisan nakaihap nang Philippine Statistics Authority (PSA) og 213,781 ka households sa Dakbayan sa Sugbo sa census niadtong 2015. Inay moangkon sa ilang sayop, nangugat si Labella nga gawas nga mas bag-o ang listahan sa DOH --kay kinuha gikan sa 2016 Census-- mas kumplito pa g’yud kay naglakip sa mga ngan sa mga pangu sa mga pamilya.
* * *
Morag wa matarung ang imbestigasyon ni Labella kay nisiwil ang daghang sayop sa iyang kasayuran:
• Una, gitataw sa PSA nga wa silay gihimong Census of Population (PopCen) niadtong 2016;
• Ikaduha, lisod tuohan nga inay napun-an naibanan na hinuon og 35,781 ka pamilya ang dakbayan sa niaging lima ka tuig; ug
• Ikatulo, mas daghan ang households nga naihap sa PSA sa ilang census niadtong 2010 --nikabat og 195,461, labaw og 17,461 sa ihap sa DOH.
* * * Diin man diay kuhaa ang listahan sa DOH nga gibiliban pag-ayong Labella? Nangagpas ang among tinubdan sa PSA nga ang listahan gipasikad sa ilang census niadtong 2007 nga nakaihap og 177,197 ka households. Mahimong gipun-an lang sa DOH o ni Labella og 803 aron pagbanabana sa gidaghanon sa mga pamilyang hataganan og passes. Sa ato pa, 13 anyos na ang listahan sa DOH nga gipamugos ni Labella di lang kausa kon dili kaduha: Maoy gipasikaran pag-ila sa mga pamilyang ipaubos sa rapid mass testing niadtong Mayo ug sa mga gihatagan sa bag-ong passes sa niaging semana.