Nag-ikogay ang mga banga

Gi-anam-anam sa mga sakop sa Inter-Agency Task Force (IATF) batok sa COVID-19 sa pagpahibawo ang ilang nakita nga kasaypanan sa pamunoan ni Cebu City Mayor Edgar Labella nga maoy ilang gitumbok nga hinungdan sa paspas ug lapad nga pagsulbong sa mga kaso nga maoy nakapabilin sa dakbayan ubos sa Enhanced Community Quarantine (ECQ).

Gawas nga anam-anam, puno sa panagana ang pagpadayag sa IATF sa ilang mga sugyot unsay angayng himuon kay pulos alyado ni Presidente Rodrigo Duterte ang lokal nga mga opisyal. Kon mga kaatbang pa, hagbay ra tingaling gipangsuspenso.

***

Dihang gibalik ang dakbayan sa ECQ niadtong Hunyo 16, labihang kisikisi nilang Labella, Presidential Assistant Mike Dino, ug kaubanan kay niinsistir nga kontrolado ang mga kaso:

- Kasagaran sa bag-ong mga kaso sa COVID-19 way timaan sa sakit;

- Ang mga nangaayo sa sakit maoy kinadaghanan kon itandi sa Metro Manila ug ubang bahin sa nasud;

- Ang gidaghanon sa nangamatay kon itandi sa kinatibukang mga kaso maoy labing ubos sa tibuok nasud;

- Ang PCR testing sa dakbayan maoy kinadaghanan sa tibuok nasud; ug

- Ang dakbayan maoy labing andam sa kalibotanong pandemiya.

***

Apan inanayng gibutyag sa taga IATF ang ilang nakita nga tinuod nga hulagway sa mga kaso sa COVID-19 sa dakbayan:

- Labihang sulbong sa seryuso ug kritikal nga mga kaso nga niawas nang mga tambalanan ug namalibad na sa dugang mga pasyente;

- Ang 32.8% nga positivity rate (33 ang nagpositibo sa matag 100 nga gikuhaan og swab samples) maoy kinatas-an sa tibuok nasud ug nagtimaan sa kakuwang sa COVID-19 testing; ug

- Taphaw ang contact tracing kay 30% ra (tulo sa matag 10) sa close contacts ang nasubay.

***

Kon may uwaw pa lang unta silang Labella, Dino, ug kaubanan, hagbay ra unta silang nanganaog sa katungdanan. Apan inay mangayo og pasaylo sa ilang responsibilidad sa wa kinahanglanang paglugway sa pagkatanggong sa mga Sugbuanon sa ilang kabalayan, ang lokal nga mga opisyal nagpaugat pagsukwahi sa nagbuntaog nga mga ebidensiya sa ilang pataka ug padayong niawhag sa katawhan nga magagwanta lang kay nahibawo sa ilang gihimo.

Wa hinuon silay kalainan sa nasudnong gobyerno. Pulos sila di kamao, nagyagaw, naglibuglibog ug maoy labing dako og natampo sa pagkatap sa kagaw.