Nisamot pagsulbong bisan ECQ

Ikatulo na rong semana sa pagtutok sa nasudnong gobyerno sa paspas ug lapad nga pagsulbong sa mga kaso sa COVID-19 sa Dakbayan sa Sugbo ug ikaupat nang semana human gibalik ang dakbayan sa Enhanced Community Quarantine (ECQ), apan nagpadayong wa mabadlong ang pagkatap sa kagaw.

Sa ihap sa Cebu City Health Department, nadugangan og kapin sa libo ka kaso ang dakbayan sa niaging semana. Mas daghan pa g’yud ang bag-ong mga kaso nga nalista sa Department of Health nga sa kinatibuk-an niabot na og kapin sa 6,000.

Nagpasabot ba ni nga di diay ang mas higpit nga mga lagda sa ECQ ang makabadlong sa COVID-19? Nagkahulogan ba nga di epektibong makabadlong sa kagaw ang pagdugang sa mga polis ug mga sundawo ug ang pagbalikbalik sa Sugbo sa mga sakop sa gabinete ni Presidente Rodrigo Duterte?

Dako ning tamparos sa pasangil sa presidente nga ang ka way disiplina sa mga Sugbuanon maoy nakapadaghan sa mga kaso. May sukaranan diay tingali ang kabalaka nga ang katawhan lay gitulisok aron pagtabon sa kapakyas sa taga-gobyerno pagtuman sa ilang trabaho. Unsa man tinuod ang kapuslanan sa pagpadayon sa lockdowns ug pagtanggong sa mga Sugbuanon sa kabalayan kon nagtinakdanay nang mga molupyo? Ang pait nga kamatuoran mao nga di makita ug labaw nang di molayas ang kagaw bisan pila pa ka tangkeng iggugubat ang ipakatap.

Matultolan lang ang mga nataptan sa kagaw aron nga mabuwag ug matambalan sa di pa makapanakod sa mas daghan pinaagi sa lapad nga COVID-19 testing. Nga hagbay rang gipasalig apan wa pa g’yud matuman sa gobyerno di lang sa Sugbo kon dili sa tibuok nasud.

Sama sa naandan, kutob ra gihapon sa pasalig ang gobyerno. Gipahibawo sa Inter-Agency Task Force (IATF) nga nilambo nang kapasidad sa testing sa mga laboratoryo sa Sugbo ngadto sa 6,000 matag adlaw. Apan ang aktuwal nga testing nga nahimo kapin ra sa libo.

Wa ni kalainan sa nahauna nilang pasalig nga kapin na sa 50,000 ka tests ang inadlawng kapasidad sa 66 ka laboratoryo sa tibuok nasud. Sa way pagpasabot nganong kapin ra sa 10,000 ang aktuwal nga tests ang nahimo matag adlaw.