Mga taslakan diayng dagko
Dihang gipanamastamasan ang mga mananambal sa Sugbo atol sa pagsulbong sa mga kaso sa COVID-19, nga giila gani ang Dakbayan sa Sugbo nga maoy epicenter sa tibuok nasud, way lokal nga opisyal sa mga dakbayan ug
kalungsoran nga nanalipod sa tinuod nga mga bayani --ang mga nagtuon, nagtukaw ug nibuhis sa ilang kahimsog ug kinabuhi aron lang pagluwas sa mga natakdan sa kagaw.
Bisan gihulga silang ikiha ug bisan gipasanginlan nga nisupak sa tuob kay di nang kapanguwarta sa mga pasyente, way politiko sa Sugbo nga nisimpatiya sa mga mananambal.
***
Dihang gipasanginlan karong bag-o ang tambalanan ug mga doktor nga nipalabi sa kuwarta kay sa kinabuhi sa ilang mga pasyente, way lokal nga opisyal sa Sugbo nga nitingog pagpadayag og pagsalig sa mga mananambal kansang pagtuman sa ilang mga gimbuhaton bisan tanang hulga ug panghasi nakatabang sa pagtidlom sa mga kaso sa COVID-19.
Dihang gipakauwawan ang doktor nga igo lang nipasidaan sa posibleng pagsulbong pagbalik sa mga kaso sa Sugbo, way politiko sa Sugbo, bisan ang labing nakaila sa iyang katakos ug kaligdong, nga nanalipod niya.
***
Dihang gitulisok ang mga Sugbuanon nga gahi og ulo, way disiplina ug maoy sad-an sa paspas ug lapad nga tinakdanay, way lokal nga opisyal sa Sugbo nga nibarug aron pagpanalipod sa kinabag-an nga nisunod sa mga lagda pagpabilin sa ilang pinuy-anan bisan nagkahulogan sa pagkawagtang sa ilang panginabuhi.
Bisan nabantang na nga ang kakuwang sa swab testing ug kataphaw sa contact tracing maoy nakapakatap sa kagaw, way politiko nga nangahas sa pagpanalipod sa kinatibuk-ang kamasinugtanon sa mga Sugbuanon.
***
Mga politiko sa Sugbo labihan kamapahimuslanon sa tanang kahigayonan nga momatuod nga sila ang hawod ug busa sila maoy angay nga masunod, bahala na kon maglakip sa pagpataka paghimo og mga lagda sa pandemya nga nisangpot hinuon sa kaguliyang inay nga makatabang sa kinabag-an.
Apan samang mga politiko labihan kahilumon kon dunay mas hawod nila nga molabaw sa ilang pataka. Maayo lang silang moapiki sa mga gagmay nga way ikasukol. Apan kon mas taas nang mga opisyal ang mosalida --bahala na kon mga doktor o mga Sugbuanon ang pareglahan-- mokalit lang og pangluspad ang ilang kiting.