Nagkahuyang apan mas mananakod

Human sa pasiunang mga pangangkon niadtong Hunyo nga nagkahuyang nang SARS-CoV-2, ang kagaw nga mosangpot sa COVID-19, may nitumaw nga lab-as nga mga timaan nga di na sama kagrabe ang kahimtang sa mga nangasakit ug nitidlom na sang gidaghanon sa mga nangamatay.

Nidason ang bag-ong kasayuran sa kontrobersiyal nga mga

pangangkon sa pipila ka doktor sa Italya, Estados Unidos, ug Singapore nga ang kagaw nga nitapot sa ilang mga pasyente sugod niadtong Abril di na sama kabangis sa orihinal nga kagaw niadtong Pebrero ug Marso.

***

Apan kasagaran sa mga pagtuon sa pagmenos sa grabeng mga kaso ug mga nangamatay sa nagkalainlaing kanasuran nilikay sa pagtuki sa kahigayonan nga naluya nang kagaw. Ila hinuong gitumbok ang mosunod nga posibleng mga hinungdan:

- Daghan nang tambal nga napamatud-an nga epektibo sa pagtabang sa pasyente aron nga di mograbe, di maglisod og ginhawa, di masud sa ICU ug di magkinahanglan og ventilator; ug

- Mas takos nang mga doktor, nurses ug mga tambalanan sa pag-atiman sa mga pasyente ginamit ang malampusong kasinatian nga gipakisaw-an sa ilang kaubanan sa ubang kanasuran.

***

Pipila ka siyentipiko nangagpas nga di na sama kagrabe ang mga pasyente sa COVID-19 karong bag-o di tungod kay nihuyang ang kagaw kon dili tungod kay di na sama kadaghan ang kagaw nga nakasud sa ilang lawas kon itandi unom ka buwan ang nilabay. Mao ni ang nahitabo sa ubang coronaviruses apan wa pa hinuon mapamatud-i sa COVID-19.

Gitumbok sa mga siyentipiko nga nakatabang ang mas lapad ug hiningusgan nga pagpatuman sa mga panagang sa kagaw sama sa pagsul-ob og face masks, pag-distansiya og usa ngadto sa duha ka metro ug pagsige og panghunaw sa kamot.

***

Apan bisan gisalikway na sa kasagaran sa viral geneticists --kinsa niinsistir nga wa silay namatikdan nga dagkong kausaban sa SARS-CoV-2 niadtong Disyembre hangtod karon-- nagkadaghan ang mga doktor nga kumbinsido nga ang kagaw nahuyang apan nahimong mas mananakod. Gipasikaran sa ilang pagtuo ang nahitabo sa nangaging coronaviruses.

Ang mga kagaw nga nangambak gikan sa hayop ngadto sa tawo nisangpot sa epidemiya ug daghang kamatayon sa karaang panahon nagpabilin sa atong palibot hangtod karon. Apan igo na lang nga makamugna og yano nga sip-on.