Kalibotanong puhalay sa bakuna
Ang tanang bakuna nga mahimo karong tuiga sa mga planta sa Moderna sa Estados Unidos ug ubang kanasuran sa kalibotan napalit na sa labing adunahan nga mga nasud. Sa ato pa, ang mosunod nga mga transaksiyon hinigtan na sa limitasyon nga unya pa sa 2022 mahimo ang mga bakuna.
96% sa mga bakuna nga mahimo karong tuiga sa mga planta sa Pfizer/BioNTech sa Estados Unidos, Germany, ug ubang kanasuran nakompra na sa labing adunahan nga mga nasud. Sa ato pa, 4% na lay nahibilin sa umaabot nga mga transaksiyon.
Nangu sa kalibotanong tulisok sa mga mapahimuslanon mao ang World Health Organization (WHO). Kansang Direktor Heneral Dr. Tedros Adhanom Ghebreyesus nibutyag nga samtang 40 milyones nay nabakunahan sa 49 ka adunahan nga mga nasud, 25 ra ang nabakunahan sa usa sa kabos nga mga nasud.
Ginamit ang dagko nilang katigayonan ug sinalikway ang bisan unsa nga lama sa ilang tanlag, ang Estados Unidos, Britanya, ug ubang kanasuran nag-iyahay sa pagsipong sa tanang nag-una nga mga kandidato nga bakuna, apil nang mga bakuna nga wa pa mahimo sa mga pabrika. Labing gisaway ang Canada nga, tungod sa way kinutoban nilang kuwarta, nagpatuyang pagkontrata sa tanang bakuna nga ilang napakyaw. Ang resulta? Labihan kadaghan sa natumpi nga bakuna gikan sa Pfizer/BioNTech, Moderna, ug AstraZeneca nga mahimong bakunahan og kalima ang tanang 37.59 milyones nila ka molupyo.
Makalusot hinuon ang Canada ug ubang kanasuran nga naneguro silang makapamakuna dayon. Gawas pa, way nahibawo pila ra sa ilang gipamalit nang daan ang mapamatud-an nga luwas ug epektibo. Mao ni ang pait nga kahimtang sa Pilipinas ug ubang kanasuran nga way binilyon ka pesos nga pundo nga mahimong isugal alang sa mga bakuna nga wa pa makahingpit sa ilang clinical trials. Di katabang ang kapakyas sa pagpangandam sa hapsay ug makiangayon nga pag-apud-apod kon mangabot na ang mga bakuna.
Ug bisan sa abunda nga pagarpar sa Malakanyang di masaaron ang umaabot. Iwit na tang daan sa linya sa pagpamalit sa mga bakuna, naglutaw pa ang giwara-wara nga Philippine National Vaccine Roadmap. Gawas nga way klarong detalye, naglakip sa tanang timaan sa nag-ung-ong nga kaguliyang.