Nganong kuwang ang testing
Kapin na sa buwan human sa pagsugod sa kinapaspasan nga pagsulbong sa bag-ong mga kaso sa COVID-19, kanus-a nipasalig ang Malakanyang sa pagpalapad sa inadlaw nga testing ngadto sa 90,000 ka tests kada adlaw, nagpabilin nga mingaw ang testing nga mao unta ang kinakusgan nga paagi sa pagtultol ug
pagbadlong sa tinakdanay.
Ambot nganong wa pa matuman ang ilang pasalig. O tingali nawad-an na og bisan gamay na lang kaikog nga ang ilang mga gipanulti wa na motakdo sa aktuwal nga mga panghitabo sa napakyas nilang kampanya batok sa pandemya.
Nihimo og duha ka importanteng pahibawo silang presidential spokesman Harry Roque ug testing czar Vince Dizon sa niaging buwan: Una, nga niabot na og kapin sa 50,000 ka tests ang nahimo kada adlaw sa 239 ka molecular laboratories sa tibuok nasud; ug ikaduha, nga paabton og 90,000 ka tests kada adlaw.
Pulos sayop ang duha: Wa kaabot og 50,000 ka tests ang nahimo kada adlaw hangtod sa niaging semana; ug wa pay timaan kanus-a makab-ot ang inadlaw nga 90,000 ka tests nga ilang gipasalig.
Ang pasalig sa mas daghang tests gipasikad sa pagpamalit sa Malakanyang og rapid antigen test kits nga, samtang di sama kakasaligan sa PCR tests, mas paspas nga mahibaw-an ang resulta. Niabot na ang pasiunang nakompra nga kits sa niaging semana pero wa pay klaro kanus-a maapud-apod ug magamit sa mga syudad ug mga lungsod nga kinadaghanan og kaso.
Mag-agad hinuon ang gidaghanon sa tests pila ang ma-trace sa tanang close contacts sa positibo nga mga kaso. Niaging semana pa sila nagsugod og pang-hire og dugang contact tracers.
Tungod sa kabalaka nga kon dugangan ang inadlaw nga tests mosamot pagburot ang bag-ong mga kaso, nga mahimong mas makapa-alarma sa katawhan, mahimong matental ang gobyerno sa pagpabilin sa naandang gidaghanon sa swab tests.
Nga dakong sayop. Kay kon di makaapas ang inadlawng tests, mas daghang positibong kaso ang di matultolan. Mao nga di dayon matambalan sa di pa mograbe ang kahimtang ug mosamot pag-awas ang mga ospital ug isolation centers. Ug makapanakod sa mas daghan nga moresulta sa mas lapad pa g’yud nga katalagman.