Laing timaan sa premeditated plunder

Niay kasayuran nga angayng tukion sa Senate Blue Ribbon Committee sa sunod hugna sa imbestigasyon sa paghatag sa gobyerno og P11 bilyones ngadto sa way puhonan ni track record nga Pharmally Pharmaceutical Corp. taliwa sa pandemya: Ang Procurement Service sa Department of Budget and Management (PS-DBM) namalit na og medical equipment ug supplies para sa Department of Health (DOH) bisan wa pay COVID-19.

Kon mapamatud-an, mahagsa ang panagang sa pamunoan ni Presidente Rodrigo Duterte nga dinalian ang mga transaksiyon maong bisan taas ang presyo kinahanglang himuon dayon pagluwas og mga kinabuhi.

***

Si kanhi health secretary Esperanza Cabral ang nibutyag sa kasayuran. Nga nisukwahi sa pangangkon ni Health Secretary Francisco Duque III nga nagpatabang lang sila sa PS-DBM tungod sa kadinalian sa panginahanglan sa personal protective equipment (PPEs) aron nga makatingob sila sa ubang gimbuhaton pagduma sa pandemya.

Sa wa pa moulbo ang pandemya niadtong 2020, nahibaw-an ni Cabral gikan sa iyang kanhi mga sakop sa DOH nga gisugo sila sa paghunong sa naandang mga transaksiyon ug pagtugyan na ngadto sa PS-DBM sa pagpamalit sa CT-scans ug ubang mga ekipo.

***

Kon tinuod nga ang PS-DBM na ang namalit sa mga panginahanglan sa DOH sa wa pang pandemya makaangkon og sukaranan ang mga pagduda nga lain ang katuyoan sa taga Davao --silang Lloyd Christopher Lao ug Warren Liong-- nga nibanos sa pagduma sa PS-DBM.

Mahatagan sab og laing kahulogan nganong gibalhin ang P42 bilyones sa DOH ngadto sa PS-DBM nga way memorandum of agreement ug nganong gidalidali pagreclassify and PPEs isip common use supplies and equipment (CUSE) aron ma-outsource sa DOH ngadto sa PS-DBM.

***

Nangalisbong mga transaksiyon maoy ebidensiya sa pagpabor nilang Lao ug Liong sa mga negosyante nga mga suod sa presidente ug kansang kakuwang sa puhonan sayon nga gitapakan sa financier nga si kanhi presidential economic adviser Michael Yang:

- Gipalabing mas taas nga presyo sa Pharmally kay sa mas ubos nga presyo sa local manufacturers sa PPEs nga napugos pagtaktak sa kaliboan ka kawani human gilangay-langay sa PS-DBM ang deliveries sa gamay nang daan nilang mga kontrata; ug

- Klarong konsabo ang paghatod sa Pharmally og 500,000 ka face masks bisan wa pay purchase order sa PS-DBM.