Pamakak batok ni Marcos Sr.
Morag mao na ni ang mahitabo sa mosunod nga unom ka tuig. Bisan nahibawo nga daghan ang nagbantay sa tanan niyang sulti, si Presidente Ferdinand Marcos Jr. magpatuyang sa paghimo og bakak nga mga pangangkon. Di siya mauwaw nga masakpan. Di niya bakwion bisan kurhian.
Igo lang nipatigbabaw sa tradisyon sa ilang pamilya. Nangangkon si Ferdinand Marcos Sr. nga bayani pinaagi sa pag-imbento og mga medalya sa ikaduhang gubat sa kalibotan ug na-presidente. Nangangkon si Ferdinand Marcos Jr. nga paraiso ang Pilipinas ubos ni Marcos Sr. ug na-presidente sab siya.
***
Usa sa nasakpan nga daghang bakak sa diskurso ni Marcos Jr. sa iyang inugurasyon niadtong Huwebes mao ang pangangkon nga siya ang nakakuha sa labing dako nga mandato sa eleksiyon sa kasaysayan sa demokrasya sa Pilipinas.
Mapangahason ang pangilad. 58.77% ra sa mga boto ang iyang nakuha niadtong Mayo 9. Sayon siyang kurhian pinaagi sa pagsubli sa kasaysayan. Mas dako og mandato nga nakuha silang Manuel Quezon sa eleksiyong presidensiyal sa 1941 (81.78%) ug 1935 (67.99%) ug Ramon Magsaysay sa eleksiyong presidensiyal niadtong 1953 (68.9%).
***
Mas lisod sabton nga apil sa gikawatan sa luna sa kasaysayan ang iyang amahan. Nga nilabaw niya sa duha ka eleksiyong presidensiyal: Nakakuha si Marcos Sr. og 61.47% niadtong 1969; ug 88.02% niadtong 1981.
Posibleng wa mobilib si Marcos Jr. sa mandato sa iyang amahan sa 1969, kay gipasanginlan man ni Serging Osmeña Jr. og lapad nga tikas, ug sa 1981, kay si Marcos Sr. ang nagpili sa iyang kaatbang human niboykot ang oposisyon.
***
Mas masabtan ang kabantang sa mga bakak ni Marcos Jr. kon angkunon ang kahigayonan nga wa siya magtinguha pagkumbinser sa kinabag-an sa katawhan sa Pilipinas ug ubang kanasuran. Igo lang niyang gidugangan og kumbinser ang 31 milyones ka botante nga, bisan sa tanang pasidaan, nipili niya.
Di mabasol ang pagtuo ni Marcos Jr. nga kay gituohan man sa mga botante ang pangilad sa iyang amahan sa 1965 hangtod sa 1986, ug kay gikalawat man sa mga botante ang samang pangilad sa eleksiyon karong tuiga, mailad hangtod sa hangtod ang gidaghanon sa mga botante nga igong makapabilin nila sa gahom.