Uso pa bang kaligdong sa eleksiyon?

Gibasol sa kapildehan nilang kanhi bise presidente Leni Robredo ug kanhi senador Kiko Pangilinan sa eleksiyon sa Mayo 9, gawas sa kakuwang sa kuwarta, mao ang kakuwang sa panahon. Uwahi nang nihukom si Robredo sa pagdagan. Mas uwahi nga nakasugod ang iyang kampanya.

Mao nga nahunahunaan sa ilang mga dumadapig

dihang naklaro ang resulta sa eleksiyon mao ang pagsugod na sa pagpangandam para sa sunod nga lokal ug nasudnong eleksiyon sa Mayo 2025. Wa gihapon silay kuwarta pero ang sayong pagsugod mahimong makapapas sa bentaha sa tradisyonal nga mga politiko.

***

Nagtuo sila nga ang tulo ka tuig igong panahon sa pag-organisar sa lokal nga mga kampanya:

- Pakigsulti sa katawhan aron pagsusi sa ilang kahimtang sa mga barangay, mga lungsod, mga syudad, mga distrito ug mga probinsiya;

- Pagkonsulta nila kinsa ang mga labing takos ug ligdong nga angayng motanyag sa ilang kaugalingon sa umaabot nga eleksiyon; ug

- Pagdasig nila pag-umol sa mga plataporma nga makatubag sa mga panginahanglan, paglatid sa epektibong mga paagi pagpasabot ug pagkumbinser sa ilang kasilinganan ug pagpalihok sa organisasyon nga makapatuman sa mga pangandoy sa kalamboan.

***

Kon manguhong nang lokal nga politikanhong mga organisasyon, nagtuong mga dumadapig nilang Leni ug

Kiko nga mas sayon ang paglusad sa mas gamahanang lokal ug nasudnong kampanya pagpahimutang sa labing takos nga mga kapitan, mayor, gobernador, kongresista, party-list groups, ug senador.

Kon madugangan ang lokal ug nasudnong mga opisyal nga moduso sa gobyerno nga matinud-anon nga determinadong maningkamot para sa kalamboan sa tanang Pilipinhon, mas dakong kahigayonan nga mas tarung ang mga mapili sa eleksiyong presidensiyal sa 2028.

***

Pero ang pagdamgo usa ka butang, ang pagtuman ini laing butang. Ang urom sa niaging eleksiyon, nga gidominahan sa binilyon ka pesos nga pinalitay sa mga lider ug mga botante, makapapugwat sa paghandom sa mas maayong ugma.

May luna pa bang tarung nga kampanya sa eleksiyon? May interesado pa ba kinsay labing maayo og track record ug plataporma? Uso pa bang pagtuon unsay sulbad sa kakabos, inhustisya, krimen, ug pangurakot? O mas maayong moapil na lang sa pagpangawat nga morang way ugma? Aron may ikatugbang ug di na maanod sa baha sa vote buying?