Kasaligan ba ang FDA?

Human gi-recall sa Taiwan ug pila ka nasud sa Uropa ang inilang brand sa instant noodles kay nasagolan og makahilong kemikal, ug human nipasalig ang lokal nga Food and Drug Administration (FDA) nga luwas para sa mga konsumidor ang samang brand nga hinimo sa Pilipinas, di ko maghisgot sa gipasangil nga sindikato sa pangurakot sa atong FDA.

Tuguting isugilon ang akong kasinatian sa laing produkto sa samang manufacturer sa Lucky Me!, ang akong pabiorito nga SkyFlakes. Palihug isipa ni nga pagdayeg. Ug sa samang higayon reklamo.

***

Ganahan ko sa SkyFlakes sukad sa gamay pang bata tungod sa lami–tab-ang nga may pasumbingay sa gamayng parat, sa panagsa nga pagtumaw sa tamis, ug sa mas abundang karambola sa harina nga may gamayng pisik sa mantika.

Pero ang tinuod nga rason nga mangita sa SkyFlakes bisan sa daghang kumpetinsiya maong talagsaon nga kakagumkom. Lahi sa uban nga mas humok ug mas sayon nga usapon. Makapatay-og sa baba pero mahigalaon sa lagos ug ngipon. Di mahilom og kaon pero di makapamaol sa apapangig. Hinaot masabtan nganong moreklamo ko nga sunudsunod nga nakapalit og bahaw.

*** Nakamatngon kong bahaw ang gikaon sa pila na ka semana dihang nakatsamba og puwerteng preskoha. Di hunit, gamay na lang og kuwang nga makagisi sa dila ang katalinis sa mga tipaka. Lutaw ang timpla. Way mahibiling timaan sa hapit na mapan-os nga harina.

Tago nga tindahan ang napalitan. Tingali natsambahan og bag-ong delivery. Sunod palit sa inilang shopping mall, nga gituohang mas paspas ang halin ug mas bag-o og stock, bahaw na sab.

***

Gitambagan ko sa tindera nga mas kagumkom ang SkyFlakes nga pagod ang tumoy. Pero may napalit nga pagod nga hunit. Gipapili ko sa labing uwahi og expiry date. Pero may mo-expire sa Nobyembre 2022 nga mas bahaw kay sa mo-expire sa Septiyembre 2022.

Samtang nakasuway og putos nga may lima imbes upat ra ka lut-od, nadisgrasya sab og putos nga may tulo ug tunga ka lut-od. Duha ka putos ang akong nahurot samtang nagsuwat ini. Ang una kagumkom pero ang ikaduha hunit. Ambot modangop ba sa FDA. Ganahang magsusi duna bay sindikato. Pero di ko ganahang mahibawo may nasagol bang kemikal.