Pataka nilang Marcos ug Carpio
Nabantang ang kakuwang pa nilang Presidente Ferdinand Marcos ug Bise Presidente Sara Duterte Carpio sa malukpanon nga pakisusi sa di pa molusad og bisan unsang nasudnong kalihokan: Dihang ilang gipahibawo nga magsugod na ang 100% nga face-to-face classes sa tanang eskuylahan karong Nobyembre.
Ang ideya gikan ni Carpio isip Education secretary. Gisagop dayon ni Marcos atol sa labing unang tigom sa gabinete sa niaging semana. Gani, si Marcos ang nipahibawo nga andam nang tanan sa pagbalik sa giisip nga labing epektibong paagi sa pagtudlo–atubangay sa mga estudyante ug mga magtutudlo.
Kon wa pa matapti sa COVID-19, si Presidente Marcos unta ang mangunay pag-awhag sa mga mayor ug mga gobernador sa linawas nilang tigom sa kaulohan sa niaging semana nga apil ang tanang barangay, lungsod, syudad, ug probinsiya sa pagpangabli sa tanang eskuylahan. Si Carpio ang niduma sa mga tigom. Isip representante sa presidente ug isip education secretary. Pero si Marcos virtual nga niluwat og mensahe samtang nag-isolate sa iyang pinuy-anan. Naghiusa ang duha ka lider paghaw-as sa edukasyon gikan sa pagkatanggong sa kapin sa duha ka tuig nang pandemya.
Duna lay gamay nga problema. O duha ka problema: - Nakalimtan nilang Marcos ug Carpio ang pagkonsulta ang mga magtutudlo, nga nitiyabaw dayon nga wa pa mahuman ang ilang trabaho sa school year 2021-2022 ug di pa sila andam sa face-to-face classes sa Nobyembre; ug - Wa nila mapaminaw ang mga pasahero ug transport groups nga mosamot ang grabe nang kakuwang sa mga sakyanang pamasahero ug maapil ang mga estudyante og katanggong sa kadalanan.
Mahimong nakumbinser silang Marcos ug Carpio sa argumento sa economic managers ni kanhi presidente Rodrigo Duterte nga makatabang pagpabangon sa nasudnong ekonomiya ang pag-abli sa mga eskuylahan. Wa nila mabantayi nga, sama sa ubang nagkaguliyang nga nangaging mga programa, igo rang nag-drowing sa papel ang napulihang administrasyon. May sukaranan ang awhag nilang Marcos ug Carpio nga kon magkahiusa ang katawhang Pilipinhon masulbad ang labing dagkong problema sa nasud. Pero unsaon nato paghiusa kon idiretso ra sa pagpatuman ang bisan unsay ilang mahunahunaan? Sa way pagsusi posible ba, may lapad bang suporta ug, labaw sa tanan, makiangayon ba sa tanang hingtungdan?