Maminaw imbes mamanghag

Manghinaot ta, para sa luwas nga pagbalik sa face-to-face classes, nga nahibawo si Bise Presidente ug Education Secretary Sara Duterte Carpio sa iyang gipanulti. Dihang gipangutana unsaon pagsulbad ang kakuwang sa classrooms, nipasalig siya nga giandam na ang department order para sa paspas nga classroom construction. Kon ang pagbuhat sama pa lang kasayon sa pagsulti, angayng pahinumdoman si Carpio, ang tanang payag kastilyo na karon. Hinaot nga may makabaton og kaisog pagsulti niya nga di masulbad sa department order ang higanteng kakuwang sa di pa magsugod ang face-to-face classes sa Nobyembre 2, Adlaw sa mga Minatay. Kon makahigayon lang si Carpio sa pagbasa sa mga dokumento sa DepEd, puno sa naandan nila sa Davao City nga pagpanghudlat ug pagpamanghag, nga malampuson nga gipahamtang sa iyang amahan nga si kanhi presidente Rodrigo Duterte sa tibuok nasud sa niaging unom ka tuig, iya untang mahibaw-an nga 242,603 ka classrooms ang kinahanglan nga tukuron: - 110,954 pagtapak sa kakuwang sa classrooms; - 85,524 pag-ilis sa karaan nga classrooms; ug - 46,125 classrooms para sa lagyo ug hilit nga mga lugar. *** Kon maminaw lang sa briefing sa mga opisyal nga naguna niya sa duyan sa DepEd ug busa mas nasuhito sa labing dinalian nga mga panginahanglan sa edukasyon, mahibaw-an unta ni Carpio nga di piraso sa papel sa iyang pirmahan nga department order kon dili ₱1.08 trilyones ang gikinahanglan nga igahin sa Kongreso aron matukod ang kuwang nga classrooms sa mosunod nga tulo ka tuig: - ₱333 bilyones para sa 2023; - ₱374 bilyones para sa 2024; ug - ₱374 bilyones para sa 2025. *** Dihang gipahibawo sa pahimangno sa mga magtutudlo ug transport groups nga di pa sila andam sa pag-eskuyla sa kapin sa 27 milyones ka estudyante, niinsistir si Carpio nga mapatuman ang iyang rekomendasyon pag-abli sa mga eskuylahan karong Agosto 22 ug pagsugod sa 100% nga face-to-face classes karong Nobyembre 2 kay aprobado na sa presidente ug gabinete. Hinaot nga may makapahinumdom ni Carpio nga di ang presidente ug gabinete ray makatabang niya pagpalambo sa kalidad sa edukasyon. Gikinahanglan niyang tabang sa ubang sektor ug mga ahensiya. Nga di niya makuha kon di mangonsulta ug maminaw nila.