Hinaot nalikayan ang lit-ag
Pila na lang ka adlaw sa wa pa mokanaog sa Malakanyang, ang administrasyon ni kanhi presidente Rodrigo Duterte nakasingit pa g’yud og pangutang sa China og ₱19.32 bilyones para sa pagtukod og taytayan nga mosumpay sa Davao City ug Samal Island.
Gibasura ni Duterte ang gidamgo nga taytayan nga mohiusa sa Sugbo ug Bohol tungod sa kadako sa gasto (gibanabana nga ₱56.62 bilyones), pero nakakita g’yud og tinubdan para sa proyekto sa iyang kaugalingong nataran. Taas ang listahan sa mga proyekto sa Davao nga gisaad sa China ni Duterte.
***
Sa pagbanos ni Duterte sa Malakanyang niadtong 2016, nag-una ang Davao sa listahan sa China nga apil sa Belt and Road Initiative (BRI) nga mosumpay sa infrastructure ug negosyo (ug gipaabot nga mopahumot sa China) sa mga nasud sa Asya ug Africa.
Usa sa kinadak-ang proyekto iya sa CCCC Dredging Group, ang kompaniya sa China nga nitukod sa artificial island sa South China Sea, nga magtukod og tulo ka artipisyal nga isla sa 208 ka ektarya nga reclamation, nga kabahin sa ₱39 bilyones nga Davao Coastline and Port Development Project. Mas dako pa gyod ang ₱83 bilyones nga Mindanao Railway Project nga magsugod sa Tagum-DavaoDigos segment. ***
Nipadayag sab og interes ang China sa pagtukod og dugang mga proyekto sa Davao: ₱24.5 bilyones nga 23.3 ka kilometro nga Davao City Expressway ug ₱40.57 bilyones nga pagpalambo Davao Airport.
Pero gikanselar ni kanhi Davao City mayor karon Bise Presidente Sara Duterte Carpio ang Davao Coastline and Port Development Project. Way kuwartang gipagawas ang China sa Mindanao Railway Project. Hanap sab nga mapatuman pa ang ubang mga proyekto.
***
Imbes mahinugon, angayng magpasalamat ang taga Davao. Kay samang maniobra ang gihimo sa China sa mga lider sa Sri Lanka. Ug apil sa gibasol sa pagkabangkarota sa nasud.
Gipatuyangan og pautang sa China ang nilayas nga kanhi presidente, Gotabaya Rajapaksa, pagtukod og higanteng mga proyekto sa ilang pinuy-anan sa Hambantota: Naglakip sa ₱79 bilyones nga pantalan nga wa kabayad sa utang maong gipanag-iya na sa China, ₱873 milyones nga convention center nga nagmingaw, ug Rajapaksa Airport nga tagsa ray ayroplano maong wa kabayad sa iyang kuryente.