Makalilisang nga mga timaan

Mahimo ra g’yud unta nga di itudlo ang iyang abogado sa eleksiyon isip tsirman sa Commission on Elections. Mahimo ra g’yud unta nga lain ang itudlo nga tagduma aron nga di kadudahan ang kaligdong sa umaabot nga mga eleksiyon. Pero di siyang kasukwahi unsa ang naandan. Maoy iyang namat-an og buot ang pagpahimus sa gahom. Maoy nakat-onan gikan sa iyang mga ginikanan nga bisan unsay ilang gusto ilang makuha. Para niya mas importante ang personal nga mga panginahanglan kay sa interes sa nasud ug sa kinabag-an sa katawhan. Mahimo ra g’yud untang di hatagan og taas nga katungdanan sa House of Representatives ang hilaw pa niyang anak. Mahimo ra g’yud unta nga itugyan ang liderato sa mas hinog nga mga kongresista nga pulos ra sab iyang mga alyado. Pero mas kasaligan ang dugo sa iyang dugo. Maoy namat-an og buot nga ang labing sinaligan sa iyang mga ginikanan mao ang nag-una-una pagbudhi nila. Gani, dakong bahin sa ilang katigayonan nga igo lang untang gisalig sa iyang amahan sa ilang cronies wa pa mabalik sa ilang pamilya hangtod karon. Mahimo ra g’yud unta nga di ipamugos ang iyang ig-agaw isip speaker sa House. Ang makabungog niyang mayoriya sa Kongreso karibalan lang sa kadako sa iyang labaw batok sa iyang mga kaatbang sa niaging eleksiyon. Mahimo ra g’yung kontrolahon ang House nga di kapasanginlan nga nagpaugat ang ilang politikanhong dinastiya. Pero nakat-onan gikan sa iyang mga ginikanan nga ang permanente sa politiko mao ra ang mga interes. Idolo ang iyang amahan nga unang na-presidente sa 1965 human nibalitok og politikanhong partido. Mao ni atong mapaabot sa mosunod nga unom ka tuig. Mapuno ta sa mga pasalig sa maayong panggobyerno, pagpalambo sa ekonomiya ug panginabuhi, pagpabarato sa presyo sa pagkaon ug ubang palaliton ug pagpahiyos sa kakabos. Pero sukwahi sa sulti ang aktuwal nilang gihimo. Gipahugtan ang gawong sa mga institusyon nga mahimong makababag sa ilang plano. Ilusyon ang panghinaot, bisan sa tanang makalilisang nga timaan, nga ang bunga di sama kadunot sa punoan. Ug dakong sayop ang mga natunto nga ang pamilyang naghigwaos sa gahom sa niaging 36 ka tuig magpapuli sa puwesto sa 2028.