Nganong way nibalibad sa PS-DBM
Ambot tungod ba kaha kay ang mga naglibot niya sa Office of the Vice President ug Department of Education (DepEd) mao ang iyang mga sinaligan sa Davao City Hall sa mayor pa, taphaw ug simang ang mga tubag ni Bise Presidente ug Education Secretary Sara Duterte Carpio sa findings sa Commission on Audit (COA) sa mga transaksiyon sa DepEd.
Way labot si Carpio sa mga transaksiyon sa DepEd sa 2021 nga maoy gisubli sa COA. Mahimo ra g’yud unta siyang magpakahilom. Pero nipili pagsalida sa iyang kahilaw.
Una niyang tubag dihang gipangutana sa media sa paggawas sa report sa COA sa niaging semana nga ang ₱2.4 bilyones nga laptops sa DepEd labihang mahala ug labihang karaana: “Natubag na ang tanang pangutana sa COA.”
Hinaot nga may makahunghong ni Carpio nga ang report sa COA naglakip na sa tubag sa ahensiya nga gi-audit. Pero bisan sa tubag sa DepEd, kuwestiyonable gihapon para sa COA nganong kapin sa ₱58,000 ang kada laptop nga Intel Celeron ra ang processor (gigamit sa karaang Windows 7).
Ikaduha niyang tubag (nakabantay tingaling sayop ang una): “Angayng motubag sa COA ang Procurement Service sa Department of Budget and Management (PS-DBM) kay maoy namalit, ang DepEd igo lang nidawat sa laptops.”
Syaro way nakapahinumdom ni Carpio nga ang DepEd di makapanghunaw. Ila ang ₱2.4 bilyones nga giwaldas sa PS-DBM. Isip tag-iya sa kuwarta ug end user sa laptops, ang DepEd may katungod pagsusi sa kalidad ug gahom pagbalibad sa napalit sa PS-DBM.
Nahibawo si Carpio isip abogada nga di siyay makasohan kon mapamatud-ang anomaliya. Kon dili ang kanhi liderato sa DepEd. Pero nabalaka nga kon di duphan ang kanhi administrasyon morang nanulisok sa iyang kaugalingong amahan.
Kay sikit mang duha ka administrasyon, di masusi ang nangalisbong transaksiyon sa PSDBM, nga mao say nagbinuang sa ₱42 bilyones sa Department of Health uban sa Pharmally Pharmaceutical. Nganong ang higanteng DepEd ug DOH, nga mas daghan og kawani ug mas suhitong mamalit sa ilang panginahanglan, ni-imbudo man sa ilang kuwarta sa gamitoy nga PS-DBM? Tungod ba kay taga Davao ang mga tagduma, nga pulos tinudlo ni kanhi presidente Rodrigo Duterte?