Kuneho gi-order, bao gi-deliver

Nisugyot ang kaila nakong maestra sa eskuylahang publiko sa Cebu City nga mas matugkad ni kanhi Education secretary Leonor Briones ang kadako sa eskandalo sa overpriced ug outdated nga laptops nga napalit sa iyang administrasyon kon gamitan og mga ehemplo nga mas pamilyar sa iyang pangedaron.

Kay niinsistir man si Briones nga ang iyang papel sa transaksiyon mao ra ang pagpirma og memorandum of agreement (MOA) uban sa Procurement Service sa Department of Budget and Management (PS-DBM), angay siya nga pasabton nga ang kalapasan sa MOA maoy pabilo sa anomaliya.

***

Ang MOA nga gipirmahan ni Briones uban sa PS-DBM sa Disyembre 22, 2017 nagsugo nga ang ₱2.4 bilyones nga kuwarta sa Department of Education (DepEd) ipalit og 68,500 ka laptops, nga tag ₱35,046.50 ang buok, ug kinahanglan nga dunay labing menos 1.9 Gigahertz (GHz) base speed.

Matod sa Commission on Audit (COA) gilapas sa PS-DBM ang MOA. Kay ang ilang gipalit nga Dell Latitude 3420 tag ₱58,270.00 ang buok, maong 39,583 ka units ray napalit, ug gipalihok lang sa 24 anyos nga processor, ang Intel Core Celeron, nga duna ray 1.8 GHz clock speed.

***

Kay sama sa kasagaran nato di man kasubay si Briones unsay kalainan sa 1.8 GHZ clock speed gikan sa 1.9 GHZ base speed, nisugyot ang maestra nga gamiton ang mga hulagway nga iyang mahikap:

- Gitakda sa MOA nga nagkinahanglan ang DepEd og 68,500 ka kuneho nga tag ₱35,046.50 kada usa; pero

- Gipalit sa PS-DBM ang 39,583 ka bao nga tag ₱58,270.00 kada usa.

***

Sa way paghisgot sa technicalities nga lisod sabton, hinaot nga matubag ni Briones ang duha ka pangutana:

- Nakapalit ang DepEd og mas paspas ug mas baratong laptops sa Hulyo 2020, usa ka tuig sa wa pa mangompra ang PS-DBM, nganong gidawat man niya ang mas mahal ug mas hinay nga laptops gikan sa PS-DBM?

- Nganong wa man palihokang mas takos niyang mga sakop sa DepEd bids and awards committee ug nidangop man hinuon sa PS-DBM nga way klarong track record ug bugtong bentaha mao ra nga gidominahan sa taga Davao?