Pagtabon sa bulilyaso sa presidente
Ang opisyal sa Department of Agriculture (DA) nga gitawag sa Malacañang nga smuggler, gilumpong ni Senador Imee Marcos sa sindikato sa mga kriminal ug gipasanginlan sa Senate Blue Ribbon Committee nga nag-sabotahe sa nasudnong ekonomiya nahibalik sa gobyerno.
Si Leocadio Sebastian gitudlo nga DA Undersecretary sa Rice Industry Development. Human pakauwawi, gitahasan siya sa pagpangu sa mosunod: Rice Competitiveness Enhance Fund-Program Steering Committee, Philippine Rice Research Institute Board of Directors, National Food Authority Council, National Irrigation Administration Board of Trustees, ug International Rice Research Institute Board of Trustees.
Gi-absuwelto siya sa Office of the President sa tanang pasangil nga gisablig ni kanhi executive secretary Vic Rodriguez. Si Sebastian, segun ni Executive Secretary ug kanhi Chief Justice Lucas Bersamin, igo lang nisunod sa mga sugo nga iyang nadawat gikan ni Rodriguez ug sa presidente.
Way nangayo og pasaylo ni Sebastian. Way ek si Rodriguez. Ni ang presidente. Ni ang mayoriya sa Senate Blue Ribbon Committee nga gipangulohan ni Senador Francis Tolentino nga morang mga pahoy nga igo lang nikalawat sa tanang tulisok ni Rodriguez batok ni Sebastian.
Nganong wa na may gustong mo-utingkay sa inhustisya nga nahiagoman nilang Sebastian ug kaubanan nga gikara-kara pagpa-resign human gisalikway sa Malacañang ang importasyon sa 300,000 metric tons nga asukar niadtong Agosto sa niaging tuig?
Kay mabisto nga ang utok sa krisis sa asukar mao ang presidente: Gitugyan niyang tanan ngadto sa di diay kamao nga si Rodriguez ug nisugo siya og importasyon sa mas daghang asukar --600,000 metric tons-- sila nang Sebastian ug kanhi sugar regulatory administrator Hermenegildo Serafica ang nibaraw sa iyang pataka.
Sa iyang bag-ong puwesto, si Sebastian gihatagan sa Malacañang og gahom sa pag-umol sa operational plans sa pagpalambo sa industriya sa bugas humay sa nasud ug sa pagpatuman sa Rice Industry Roadmap.
Si Sebastian, scientist nga dunay doctorate degree sa Agriculture sa Cornell University ug nakadawat sa labing taas nga pasidungog sa Ministry of Agriculture ug Rural Development sa Vietnam, di mabasol kon magpanlingi na sa iyang luyo ug maghunahuna una og makadaghan. Sa di pa mopirma og bisan unsang dokumento. Ug sa di pa mohimo og bisan unsang lakang.