Ibalik sa Kongreso ang ilang gahom
Sa iyang pagpahibawo sa dugang makabuhong nga mga benepisyo sa mga trabahante sa Senado --₱50,000 nga inflation assistance karong Agosto ug ₱50,000 nga medical incentives karong Septiyembre-- si Senate President Migz Zubiri niawhag sa ubang ahensiya sa gobyerno ug pribadong mga kompaniya pagdugang sab sa ilang mga benepisyo.
Dunay mas maayong lakang nga mahimo si Zubiri: Ang pagkumbinser sa iyang kaubanang mga sakop sa Kongreso sa pagkuha pagbalik sa gahom nga ilang gisurender: Ang pagsubli ug pagtakda sa minimum nga suholan sa mga trabahante sa mga kompaniya sa tibuok nasud.
Halos 34 ka tuig human sa pagkatukod sa wage boards sa Central Visayas ug ubang mga rehiyon sa Pilipinas, ang bugtong nahimo sa Wage Rationalization Act (Republic Act 6727), nga napasar niadtong 1989, mao ang higanteng inhustisya ngadto sa mga anak sa singot: Ang ilang suholan ginudnod sa kinaubsan nga ang-ang.
Kay gipasikad sa pangangkon sa mga negosyante nga ilang katakos sa pagbayad, hinikalimtan ang balaanon nga katungod sa mga trabahante sa makiangayon nga suholan nga makatubag sa batakan nga mga panginahanglan sa pagkaon, pinuy-anan ug edukasyon sa ilang pamilya.
Kon may panahon sa pagpamalandong silang Zubiri ug kaubanan, human sa pagpatuyang og sabwag sa dakong kuwarta sa ilang mga upisina nga di ila, hinaot nga maminaw sa hunghong sa ilang konsiyensiya kinsay responsable sa kaapiki sa mga trabahante.
Ang Kongreso maoy nagbuot nga ang wage boards dominahan sa management ug mopitlok sa labor: Pinaagi sa pagpabotar sa regional directors sa National Economic and Development Authority ug Department of Trade and Industry nga tua kapusta sa mga negosyante.
Kon makahukom nang Kongreso pagtuman sa ilang trabaho, hinaot nga paminawon ang tiyabaw sa labor groups:
• Itakda ang minimum nga suholan base sa ebidensiya ug dili sa konsabo sa mga opisyal sa gobyerno ug mga negosyante; ug
• Himuong managsama ang minimum nga suholan sa tanang rehiyon kay ang presyo sa inadlawng palaliton sa Sugbo ug ubang probinsiya mao ra o mas taas pa gani kay sa Metro Manila ug, sama sa taga kaulohan, di puthaw ang tiyan sa mga trabahante sa mga probinsiya nga mahimo lang pikpikon kon magkutoy na.