Unsaon pagpahumot ang nasud
Sakto ang Directors’ Guild of the Philippines, Inc. (DGPI) nga kon gitugotan sa gobyerno ang trolls, fake news, ug paglubag sa kasaysayan, angayng pasagdan sab ang pelikula nga giisip nga taphaw ug di ligdong nga komentaryo sa mga panghitabo sa atong nasud.
Aprubado na ang pelikula sa Movie and Television Review and Classification Board (MTRCB). Kon bakwion tungod sa reklamo sa pipila ka politiko, mameligro ang umaabot nga mga pelikula nga mahimong babagan sab sa mga nagtungkawo sa gahom sa way sukaranan nga mga pasangil nga makadaot sa nasudnong kadungganan.
Kon gusto sa mga senador nga maluwas ang nasud sa wa kinahanglana nga kauwawan, mangahas mi og rekomendar nga ilang himuon sa labing daling panahon ang mosunod:
Motabang sa imbestigasyon sa International Criminal Court (ICC) ug itugyan ang mga gipasanginlan sa laktod nga pinatyanay sa Davao Death Squad (DDS) sukad sa 2011 ug sa tibuok Pilipinas sugod sa 2016; ug
Motabang pag-apura sa pamilya ni Presidente Ferdinand Marcos Jr. sa pagbayad sa ₱203.8 bilyones nilang utang sa estate tax ug pagtubag sa pagka-konbikto sa mga kaso sa ilegal nga katigayonan.
Labaw sa hulga sa bisan unsang pelikula, mas lang-og ang lapok nga mobulit sa kadungganan sa Pilipinas tungod sa aktuwal nga mga panghitabo:
Pagsalikway sa administrasyon sa obligasyon, ubos sa atong gipirmahan ug gi-ratify nga Rome Statute, pagtabang sa imbestigasyon sa ICC;
Pagtabon sa mga sinumbong sa extrajudicial killings; ug Paghudlat sa mga imbestigador sa ICC nga nangita og hustisya para sa mga tagtungod sa inosenteng mga biktima sa kampanya sa drugas.
Makapalambo sa imahe sa nasud, labaw sa mga laag sa nagkalainlaing kanasuran, ang pagmatuod nga ang gobyerno makapatuman sa atong mga balaod, bisan kinsay hingtungdan ug bisan kinsay maig-an.
Ang kapakyas sa Bureau of Internal Revenue sa pagkolekta sa utang sa buhis sa mga Marcos ug ang ka-inutil sa sistema sa hustisya sa pagtiwas na sa mga husay sa mga kaso sa pagpangawat sa samang pamilya ug sa ilang cronies maoy tinuod nga makapapahadlok sa langyaw nga mga negosyante pagbubo sa ilang puhonan sa nasud. Kansanang mga balaod morang balay sa lawalawa: Ang langaw masangit pero ang kabaw molusot.