Pagpanamastamas sa kasaysayan
Ug nahingpit ang pakauwaw sa talagsaong luna sa Sugbo sa kasaysayan sa pakigbisog ug pagdaog batok sa diktadurang Marcos:
• Sa niaging eleksiyong presidensiyal ang Sugbo, nga maisugon nga nisalikway ni Ferdinand Marcos Sr. sa iyang pagsugod sa pagtukod sa diktadura, nihatag og makabungog
nga mayoriya sa iyang anak; ug
• Sa ika-37 nga anibersaryo sa EDSA People Power Revolution gahapon, ang kadalanan palibot sa Fuente Osmeña, nga sentro sa daghang protesta batok sa pangurakot ug pangabuso sa diktadura, gitak-opan sa trapiko kay tukoran og higanteng entablado para sa anak sa diktador.
***
Ang ahente sa pakauwaw mao ang sakop sa pamilya nga nangahas sa pagbarug uban sa mga biktima sa diktadura. Si Cebu City Mayor Mike Rama nibalibag sa bintana sa kaligdong sa mga prinsipyo sa maayong pang-gobyerno nga gibarugan sa iyang katiguwangan:
• Iyang uyoan nga si Napoleon Rama, peryodista, delegado sa 1971 Constitutional Convention ug usa sa unang gipapriso ni Marcos sa pagdeklarar sa martial law niadtong 1972; ug
• Lain niyang uyoan nga si Dr. Osmundo Rama, kanhi gobernador sa Sugbo ug gipaubos sa house arrest atol sa martial law. ***
Gawas sa pag-insulto sa iyang katiguwangan, si Rama bangis sab nga nanamastamas sa kasaysayan. Ang Fuente
Osmeña nga 37 ka tuig ang nilabay maoy gitapokan sa mga Sugbuanon nga nangaliya, nanghilak ug nagsaulog sa kalipay sa paglayas na sa diktador sa iyang pamilya gikan sa Malacañang, mahimo ra g’yud untang di niya hilabtan aron lang pag-ulug-ulog ni Presidente Ferdinand Marcos Jr.
Tulo ka adlaw nga mahasol ang mga Sugbuanon. Giabog gikan sa Fuente Osmeña Rotunda ug gipasimang sa huot nga alternatibong mga agianan. Bisan kon Lunes pa ang kalihokan.
***
Hinaot nga wa magrepresentar sa iyang panghunahuna ang kayamukat sa iyang mensahe: Ang nalangay nga Bus Rapid Transit (BRT) project gitumong pagpahapsay sa trapiko, maong kinahanglang gubton ang mga motorista ug mga pasahero sa iyang groundbreaking.
Makalibog ang pulos-ra-istorya nga plano ni Rama para sa syudad. Makapa-alarma nga sa talagsaon kaayong higayon nga may aktuwal nga proyekto nga mahisgutan --bisan kinopya gikan sa laing mayor nga di niya ganahang pasidunggan-- ang mga Sugbuanon maoy magkaguliyang. Sa pagsubo pa lang daan. Kay wa pay seguro mahinayon ba pagpatuman.