Papating nga pagtak-om
Ambot tungod ba kaha kay lisod tubagon, o nagtuo nga kon motubag mosamot ang kontrobersiya, o naghuwat sila nga masapawan og laing eskandalo, o wa lang g’yud mohatag og importansiya sa katungod sa publiko pagpakisayod, nagpabiling tak-om ang Malacañang sa gibutyag ni Senador Risa Hontiveros nga gitugotan nilang importasyon sa asukar bisan wa pay napirmahan nga sugar order.
Lima ka adlaw na human gipakita ni Hontiveros ang mga dokumento sa Malacañang-sponsored sugar smuggling. Duha na ka press conferences ang gipatawag ni Hontiveros labot sa isyu. Padayong way ek ang palasyo.
***
Gawas nga gipasugdan sa Malacañang ang importasyon usa ka buwan sa pang publikasyon sa Sugar Order No. 6 para sa importasyon sa 440,000 metric tons karong tuiga, si Presidente Ferdinand Marcos Jr. ang nagpili sa importers nga mao ray makaapil sa transaksiyon.
Suwerteng napilian ang All Asian Countertrade Inc. Nga maka-import og 240,000 metric tons, sobra sa katunga sa kinatibuk-ang importasyon. Ambot tsamba ba lang nga ang pangulo sa kompaniya nga si Michael Escaler gipasanginlan sab sa sugar smuggling atol sa pamunoan ni kanhi presidente Joseph Estrada.
***
Sa wa pang exposé ni Hontiveros, nahibaw-an sa ubang mga negosyante sa asukar nga nidunggo na ang imported nga asukar ni Escaler gikan sa Thailand sa pantalan sa Batangas niadtong Pebrero 9, siyam ka adlaw sa wa pang effectivity sa Sugar Order No. 6.
Nagtuo ang mga negosyante nga si Escaler nag-unauna og import tungod sa abanteng kasayuran ug pasalig nga seguro siyang mahatagan og allocation. Ang wa nila mahibaw-i mao nga Malacañang ang nag-timbre ni Escaler. ***
Nahibaw-an sa mga sakop sa media gikan sa Bureau of Customs (BOC) ug Department of Agriculture (DA) nga 5,000 metric tons ang pasiunang asukar nga nidunggo. Nga gikatahong gipaagi ni Escales sa mosunod nga mga kompaniya: Rumakamlarp Export Co. Ltd., K S L Export Trading Co. Ltd., ug Sima Sugar Export Corp. Ltd.
Gikuwestiyon sa BOC ug DA ang kargamento sa All Asian Countertrade. Ambot kon mobaraw ba gihapon kon makakita na sa suwat ni DA Undersecretary Domingo Panganiban ug sa memorandum ni Executive Lucas Bersamin. Nga pulos nagtumbok nga ang presidente maoy nag-apura sa importasyon.