Tentasyon sa pagpangiyugpos

Dako ang tentasyon sa pagpangiyugpos lang atubangan sa mga panghitabo sa nasud karon. Kon makakita og pagpabaya ug kakuwang og katakos sa mga naghupot sa katungdanan, sayon rang am-aman ang atong kaugalingon nga angay silang hatagan og higayon nga makat-on.

Kon makakita og pangabuso ug pahimus sa gahom, modangop lang ta sa panghinaot nga makatunob sila og mas isog nga mopatagam nila. Kon makabantay og pangawkaw sa atong buhis, mohangad lang sa langit ug hilom nga motuaw nga ang Labawng Makagagahom na lay bahala.

Di mabasol ang mga nangiyugpos. Duna silay trabaho nga giatiman, duna silay mga pamilya nga gibuhi ug nahurot nang panahon sa pagpaningkamot para sa mas maayong ugma sa ilang mga bata. Wa hinuon ni magpasabot nga wa ta magpakabana para sa nasud.

Naglaom ta nga may mga tawo nga mas kamao ug mas isog kay nato, ug mas daghan og panahon nga ikagahin sa pagpangita og sulbad sa mga problema sa nasud ug sa katawhan. Pero unsay atong dangatan kon ang uban nipili sab sa pangiyugpos pagkumbinser sa ilang kaugalingon nga kakurhian rang sitwasyon?

Kon pipila lang o wa g’yuy maningil og mas maayong pang-gobyerno, mas modako ang tentasyon sa mga nagtungkawo sa gahom sa pagpahimus. Mangyatak sila sa mas daghang katungod, mangawat sila og mas daghang kuwarta ug mas mopalabi sa ilang personal nga mga interes.

Kon makabuylo na sa ilang mga binuang, mas lisod na silang badlungon. Mas lapad nang ilang influencia, mas daghan na sila og kuwarta nga ipamalit og mga boto ug mas daghan nang institusyon nga ilang madiktahan. Mahadlok nang mga polis pagbadlong nila. Managana nang mga korte pagsilot nila.

Di ta kinahanglan nga mobiya sa atong mga pangibuhi ug sa atong mga pamilya aron makigbisog sa katarung. Sa tukma nga mga higayon, makademanda ta og kuwentada sa mga nahimo ug naggasto sa mga opisyal sa gobyerno. Makapaningil ta og mas maayong serbisyo gikan nila.

Maka-edukar ta sa atong kaugalingon ug sa uban sa atong mga katungod ug unsaon pagpanalipod nila. Maka-organisar ta aron mahimong mas kusganon ang kawsa sa kausaban. Ang bati ug maayong balita managsama: Kita ray makaluwas sa atong kaugalingon.