Mas laktod nga pagpuli
Ang labing dakong isyu batok niya, gitug-anan ko ni anhing gobernador Roel Degamo samtang nagpadayong kampanya pagpapili sa puwesto nga nahuptan nga wa niya dagani, mao nga di siya lumad nga taga Negros Oriental. Kay taga Cordova ang iyang amahan ug taga Siquijor ang iyang inahan.
Pero wa maglisod si Degamo pagkumbinser sa mga botante sa paghatag og mandato sa iyang padayong pagduma sa Kapitolyo. Ambot tungod ba sa kakugihan niyang nangampanya. O giisip siyang lab-as nga alternatibo sa karaang mga pamilya nga dugay nang nagdominar sa politika sa probinsiya.
***
Sa wa pa siya patya niadtong Sabado, si Degamo maoy naghupot sa kinatas-an nga puwesto sa Negros Oriental sud na sa kapin sa dekada, naputol lang niadtong 2017 dihang nasuspenso siya og tulo ka buwan. Pero ang pagkasuspenso maoy nitugot niya pagdagan para sa ikaupat nga sunudsunod nga termino sa eleksiyon sa Mayo 2022.
Pagka board member ang iyang gidaganan niadtong 2010. Pero nagsunod og kamatay sa sakit silang Gobernador Emilio Macias II ug Bise Gobernador Agustin Perdices. Maong nahimo siyang bise gobernador sa 2010 ug dayon gobernador sukad 2011.
***
Labing uwahi sa mga higante sa Negros Oriental nga iyang gipatumba mao si Pryde Henry Teves. Nga maoy orihinal nga giproklamar sa Commission on Elections (Comelec) pagka gobernador.
Pero gideklarar sa Comelec nga nuisance candidate si Ruel Degamo (Grego Gaudia ang tinuod nga ngan), kansang mga boto gipuno kang Gobernador Degamo ug maoy nakapabalik niya sa Kapitolyo. Nidangop si Teves sa Korte Suprema. Pero gipatigbabaw ang proklamasyon ni Degamo.
***
Politikanhong mga kaatbang ni Degamo ang naguna sa listahan sa mga suspitsadong utok sa bangis nga pagpatay niya. Di kalikay si Teves sa mga pagduda kay ang suspitsadong mga mamumuno didto maabti sa iyang teritoryo sa Bayawan.
Si Degamo makapabilin pa unta sa Kapitolyo sa Dumaguete hangtod sa 2031. Ipuno sa iyang pundo nga 11 ka tuig, mahimo pa untang duha ka dekada ang kinatibuk-an niyang pagduma sa Negros Oriental. Uban sa iyang asawang mayor sa Pamplona, mahimo pa ganing magtukod si Degamo og dinastiya. Tingali di nang kapaabot ang iyang mga naligsan. Maong nidangop sa mas laktod nga paagi sa pagpuli niya.